Ընտրւած պատգամաւորների և ներքին ու արտասահմանեան հիւրերի՝ Հ.Մ.Ը.Մ.-ի կենտրոնական վարչութեան ատենապետ՝ եղբայր Գառնիկ Մկրտչեանի և համազգային Հայ կրթական և Մշակութային միութեան կենտրոնական վարչութեան ներկայացուցչի՝ քոյր Արին Գալստեանի ներկայութեամբ, կայացաւ դռնբաց նիստի բացումը՝ «Շահբազեան» սրահում:
Բացումը կատարւեց Կենտրոնական վարչութեան նախագահ՝ ընկեր Համլետ Խալոյեանի միջոցով նա ողջունելով պատգամաւորներին և կազմակերպութեան ընկերներին իրենց ներկայութեան համար բացատրեց թէ նոր ձևի կիրառումը 25-րդ պատգամաւորական ժողովի պաշտօնական բաժնի կապակցութեամբ նպատակ ունի չը չարաշահել հրաւիրւած հիւրերի տրամադրած ժամը:
Ժամանակաւոր դիւան ընտրւեցին երէցագոյն ընկերներ Հայդուկ Մուրադխանեանըեւ Նելլա Ղարիբեանը, կրտսերագոյնը՝ հրաւիրւեց ընկեր Նայիրի Յարութիւնեանըորին ստանձւեց նաեւ նիստի քարտուղարութեան պարտականութիւնը: Այնուհետեւ մնայուն դիւան ընտրւեցին ընկերներ՝ Սօֆի Ջաղարբէգեան, Հենրիկ Խալոյեան եւ Արա Ջահանեանը: Դիւանի կողմից մէկ րոպէ յոտնկայս լռութիւն յայտարարւեց յարգելու անցեալ տարւայ ընթացքում վախճանւած կազմակերպութեան ընկերների յիշատակը:
Այնուհետեւ ժամը լրանալով միութենական ընկերները եւ պատգամաւորները միասնաբար հիւրընկալեցին հրաւիրւած հիւրերին:
Անդրանիկ նիստի բացումը կատարւեց նոյն օրը երեկոյեան ժամը 20–ին, «Վաչիկ Ղարաբէգեան» սրահում՝ Կազմակերպութեան հիմնի նւագակցութեամբ եւ Սկաուտական միութեան ընկերների միջոցով կատարւեց դրօշի բարձրացման արարողութիւնը։
Ժողովին ներկայ էին Իսլամական Խորհրդարանում Թեհրանի եւ Հիւսիսային Իրանահայութեան պատգամաւոր դոկտ. Կարէն Խանլարեանը, Թ. Հ. Թեմի Թեմական Խորհրդի նախագահը եւ անդամները, «Ալիք» օրաթերթի եւ հաստատութեան, ինչպէս նաեւ «Հուսկ» Հաստատութեան եւ քոյր միութիւնների ներկայացուցիչները։
Կենտրոնական Վարչութեան փոխ-նախագահ ընկ. Հրաչ Զարիֆեանը ներկաներին ուղղւած շնորհակալական խօսքով բեմ հրաւիրեց Կ. Վարչութեան նախագահ՝ ընկ. Համլետ Խալոյեանին, երկամեայ զեկոյցը ներկայացնելու համար։
Ընկերը սահիկների ցուցադրմամբ, ընդարձակ կերպով ներկայացրեց շրջանի վարչութեան երկամեայ գործունէութեան զեկոյցը՝ անդրադառնալով միութիւնների ու միաւորների բարոյական եւ նիւթական ձեռքբերումներին։
Այնուհետեւ հրաւիրւեց Հ.Մ.Ը.Մ.-ի Կ.Վ.-ն նախագահ՝ եղբայր Գառնիկ Մկրտչեանը. Նա իր խօսքի սկզբում ասաց.«Ուրախութիւն եւ պատիւ է՝ կանգնել Կազմակերպութեանդ 25–րդ Պատգամաւորական Ժողովի դիմաց եւ ողջոյնի խօսք փոխանցել Հ.Մ.Ը.Մ.ի մեծ ընտանքի անունով։
«Ուրախութիւնը դարձեալ ծնւում է իրար հետ լինելու, երկու քոյր կազմակերպութիւնների փորձառութիւնները կիսելու առիթից,իսկ պատիւ է լինել մի կազմակերպութեան մէջ, որի բովանդակ կեանքը եղել է ծառայութիւն իր գաղութի, ծառայութիւն այն բոլոր արժէքների, որոնք հայութեանն ու Հայաստանին նայում են ամէն ինչից վեր»։
Եղբայր Գառնիկ Մկրտչեանը վերջում ակնարկելով երկու կազմակերպութիւնների համագործակցութիւններին եւ մեր ձեռնարկներին որոնք ծառայեցին գաղութների միջեւ հայեցի մթնոլորտը վառ պահելու եւ մեր երիտասարդութեանը հայութեան եւ Հայաստանին առնչելու հրամայականին, զօրակցութեան ու աջակցութեան կոչ ուղղեց Հ.Մ.Ա.Կ.-ի մեծ ընտանիքին:
Հ.Մ.Ը.Մ.ի Կենտրոնական Վարչութեան ատենապետը իր խօսքից յետոյ յուշանւէր յանձնեց ընկ. Խալոյեանին, եւ փոխադարձաբար ընկ. Համլետ Խալոյեանը յուշանւէրներ յանձնեց Հ.Մ.Ը.Մ. -ի եւ Համազգայինի ներկայացուցիչներին։
Ապա հրաւիրւեց Համազգային Հայ Կրթական եւ Մշակութային միութեան Կենտրոնական Վարչութեան լիազօր ներկայացուցիչ՝ քոյր Արին Գալստեանը։
Նա իր գոհունակութիւնը եւ ողջոյները փոխանցեց Համազգայինի մեծ ընտանիքի կողմից Հայ Մշակութային «Արարատ» Կազմակերպութեան բոլոր անդամներին հրաւէրի համար,ապա շարունակելով ասաց., 68 տարեկան «Արարատ» Կազմակերպութիւնը տակաւին շարունակում է մնալ Իրանահայութեան կարեւոր սիւներից մէկը։ Այդ իր մարզական եւ մշակութային երկթեւ գործունէութեամբ զարգացնում եւ դաստիարակում է նոր սերունդները եւ սատարում է հայ մշակոյթի զարգացմանը:
«Արարատ»-ի եւ Համազգայինի գործակցութիւնը նոր երեւոյթ չէ եւ հաւատում ենք, որ պէտք է զարգացնենլ փոխադարձ յարաբերութիւնները՝ արւեստի խմբերի փոխանակմամբ եւ կամ միմեանց կազմակերպած ձեռնարկները քաջալերելով։ Մենք մեր համագործակցութեան ձեռքը միշտ պարզած պիտի պահենք, եւ վստահ ենք, որ միասնական ճիգերով պիտի յաջողենք մեր առաքելութեան մէջ։
Համազգայինի Կենտրոնական Վարչութեան լիազօր ներկայացուցիչ՝ քոյր Արին Գալստեանը վերջում յաջողութիւն մաղթելով Ժողովին, աւելացրեց թէ ինքը՝ 6 տարեկանից անդամակցել է Հ.Մ.Ա.Կ.–ին,մեծ պատիւ է վայելում ներկայ լինելու Հայ Մշակութային «Արարատ» Կազմակերպութեան 25-րդ Պատգմաւորական Ժողովին:
Ընկ. Հրաչ Զարիֆեանը ընթերցեց դոկտ. Կարէն Խանլարեանի ուղերձը, նկատի ունենալով յարգելի պատգամաւորի ձայնի խզմանհանգամանքը։
Պատգամաւոր դոկտ.Կարէն Խանլարեանը իր խօսքի մէջ, նշել էր՝ «ներկայումս Հայ Մշակութային «Արարատ» Կազմակերպութիւնը իրանահայ կեանքում եզակի դեր ու անփոխարինելի կշիռ ունի, դրսից դիտողների համար Կազմակերպութեան ամէն մի յաջողութիւնը ազգային հպարտութիւն եւ պատիւ է, ու սա բնաւ պատահական չէ եւ ենթակայ է այն պարզ ու մէկին տրամաբանութեան, համաձայն որի՝ «Արարատ»-ն իր պատմական երթով ու տքնաջան գործով է վաստակել իրանահայութեան խորհրդանիշը հանդիսանալու պատիւը,ուստի միեւնոյն պահին չենք կարողանում հեշտութեամբ ներել թերութիւնները»։
Դոկտ. Կարէն Խանլարեանը իր ուղերձի վերջում արտայայտւեց.
«Ինձ մնում է միայն, որ այս վստահութեամբ, ձեզանից՝ Հ.Մ.Ա.Կ.-ի 25-րդ Պատգամաւորական Ժողովի պատգամաւորներից ակնկալել անաչառ քննարկումներ, Օբյեկտիւ գնահատումներ, յառաջիկայ գործունէութեան իրատեսական որոշումներ.... եւ մի խօսքով՝ ձեզ բոլորիդմաղթել արդիւնաւէտ ժողով»։
Ապա ընթերցւեց Ատրպատականի Հայոց Թեմի առաջնորդ Տէր Գրիգոր Ծ. Վրդ. Չիֆթճեանի ուղերձը, նա իր հայրական խօսքն էր ուղղել՝ «Այսու մեր ամբողջական յաջողութեան մաղթանքները ու յառաջիկայ ծրագրերի գծով նորանոր ձեռքբերումների բարեմաղթութիւնները ներկայացնելով ձեզ եւ յարգոյ վարչութեանդ, կամքից անկախ պատճառներով մեր բացակայութեան համար ձեր ներողամտութիւնն ենք խնդրում»։
«Թող միշտ ծաղկունք ապրի «Արարատ»-ը իր բոլոր մասնաճիւղերով ու պատասխանատուների ու հետեւորդ անդամներով, ի պայծառութիւն ընդհանրապէս Հայ կեանքի ի մասնաւորի իրանահայութեանը»։
Այնուհետեւ հրաւիրւեց «Ալիք» օրաթերթի գլխաւոր խմբագիր պրն. Դերենիկ Մելիքեանը։ Նա իր խօսքի սկզբում ակնարկելով Ընկ. Համլետ Խալոյեանի հաշւետւութեան սկզբունքին արտայայտւեց թէ նկատելի է`պատկառելի հաշւետւութիւն, որի հետ միաժամանակ ընկերը ներկայացրեց այս կազմակերպութեան առջեւ ցցւած բարդագոյն դժւարութիւնների մասին, գլխաւորաբար տնտեսական բնագաւառում։
«Նոյն հաշւետւութեան համապատասխան, վստահ եմ, որ յառաջիկայ օրերին կայանալիք Պատգամաւորական Ժողովի ընթացքում, պէտք է քննարկման ենթարկել բոլոր բնագաւառները՝ վարչական, կազմակերպչական եւ գլխաւորը՝ տնտեսական դիմագրաւելիք դժւարութիւնների համար լուծումներ գտնել»։
Դժւարութիւնները յաղթահարելու ճանապարհին, պրն. Մելիքեանը վստահեցրեց, որ՝ «Ալիք»-ը, ձեր կողքին ու թիկունքին է եւ բարոյապէս իր նեցուկը ի սպաս է դնելու «Արարատ»-ի մեծ ընտանիքին, որպէսզի միասնաբար այս համայնքային նպատակները առաջ տանենք։
Պրն. Դերենիկ Մելիքեանի խօսքից յետոյ ցուցադրւեց մի տեսաժապաւէն, որտեղ նկարագրւում էր կազմակերպութեան, միութիւնների եւ մարմինների երկամեայ գործունէութիւնը։
Այնուհետև բոլորը հրաւիրւեցին 25-րդ պատգամաւորական ժողովի կազմակերպիչ յանձնախմբի կողմից կազմակերպւած ընդունելութեանը:
25-րդ պատգամաւորական ժողովը տեւեց մինչեւ շաբաթ յունւարի 19-ը սակայն չաւարտւեց բուդջէթային օրակարգը եւ յառաջիկայ նիստի թւականը որոշւեց ուրբաթ փետրւարի 15-ը:
Կենտրոնական վարչութեան անձնակազմը ընտրւեց յունւար 23-ի նիստին ըստ հետեւեալի՝
Ընկերներ՝
Համլետ Խալոյեան
Ալէքս Կարապետեան
Ռուբինա Գալստեան
Մառինա Ղահրամանեան
Արմինէ Սէթ Խանեան
Մինաս Աղանեան
Ժոզէֆ Նազարեան
Ժորժ Աղայեան
Արա Գալստեան
