ԱՐԱՐԱՏԸ ԻՐ ԲՈԼՈՐ ՄԱՍՆԱՃԻՒՂԵՐՈՎ,
ՓԱՅԼՈՒՆ ՄԻ ՀԱՄԱՍՏԵՂՈՒԹԻՒՆ Է ԻՐԱՆԱՀԱՅՈՒԹԵԱՆ ԵՐԿՆԱԿԱՄԱՐՈՒՄ
Ատրպատական, Ազգային Առաջնորդարան Տարիների աւանդութեան համաձայն, Հ.Մ.Ա.Կ.ի կենտրոնական վարչութեան հետ համախորհուրդ, «Արարատ»-ի Թաւրիզի մասնաճիւղը Թեհրանում կազմակերպում է «Ուրախ Երեկոյ», որը երկու տարին մէկ անգամ է տեղի ունենում:
Նախանցած տարւայ հետեւողութեամբ, այս տարի եւս, Հինգշաբթի 5 Նոյեմբեր 2015-ի երեկոյեան ժամը 8-ից սկսած, «Արարատ» մարզաւանի «Վաչիկ Ղարաբէգեան» սրահում տեղի ունեցաւ լաւապէս ծրագրւած «Ուրախ Երեկոն», գեղարւեստական յայտագրով ճոխացած, կազմակերպութեամբ Թաւրիզի մասնաճիւղի վարչութեան:
Ծրագիրը հովանաւորում էր Ատրպատականի Հայոց Թեմի Առաջնորդ՝ Գերշ. Տ. Գրիգոր Ս. Եպս. Չիֆթճեանը, որը նաեւ նախագահեց երեկոյին, իր քաջալերական պատգամը փոխանցելով ներկայ խանդավառ բազմութեան: Սոյն երեկոյին ներկայ գտնւեցին «Արարատ»-ի կենտրոնական վարչութեան եւ Թաւրիզի մասնաճիւղի անդամներ, Ատրպատականի Հայոց Թեմի Պատգամաւորական Ժողովի ատենապետ Դոկտ. Արա Մելիքեանը, Թեմական Խորհրդի ատենապետ՝ Ռուբիկ Ջանանեանը, ինչպէս նաեւ բարերարներ, պատկան Մարմինների ներկայացուցիչներ, եւ շուրջ 300 նախկին Թաւրիզահայ եւ այժմ Թեհրանաբնակ հրաւիրեալներ:
Անցածն ու ներկան, հինն ու նորը, բարեկամն ու վաղեմի ընկերը իրարու մօտ բերող եւ Իրանահայութեան կարեւոր բնօրրաններից հանդիսացող պատմական Թաւրիզ քաղաքով ներշնչւելու սոյն երկամեայ իւրայատուկ առիթը, այս անգամ լաւապէս արդիւնաւորւեց, Հայաստանից ժամանած երաժշտախմբի բարձրորակ կատարումին ազդեցութեամբ: Երգիչներ եւ նւագախումբ, մինչեւ ուշ գիշեր բարձր տրամադրութեան մէջ պահեցին ներկաներին, ազգային-հայրենասիրական եւ գաւառական ճոխ երգացանկով:
Երեկոյի հանդիսավար Կարէն Սարգիսեան բարի գալուստ մաղթելով բոլոր հրաւիրեալներին, կարօտի ջերմ բառերով շեշտեց Իրանահայութեան մէկ ամբողջութիւն լինելու հանգամանքը, ու յատկապէս «Արարատ»-ի մեծ ընտանիքի սերտ գործակցութիւնն ու մասնաճիւղերի միջեւ եղբայրական անքակտելի կապը:
Սահիկների ցուցադրութեան միջոցով, Թաւրիզի մասնաճիւղի պատմութեան վերաբերող պատկերներ լուսասփռւեցին, որոնք հին ժամանակներից սկսած մինչեւ նոր օրերի այժմէական գործունէութիւնը ներկայացնում էին:
Ողջոյնի յատուկ խօսքով հանդէս եկաւ Թաւրիզի մասնաճիւղի վարչութեան նախագահ Հենրիկ Աբրահամեանը, իր ուրախութիւնը յայտնելով Թեհրանաբնակ նախկին Թաւրիզահայերի եւ հիւրերի այս լայն ընդառաջումին: Նա գնահատանքով արտայայտւեց նաեւ մասնաճիւղի զանազան բաժանմունքներին եւ յատկապէս կազմակերպիչ զոյգ յանձնախմμերին՝ Թաւրիզում եւ Թեհրանում կեանքի կոչւած, որոնք ձեռք ձեռքի տւած ծրագրի այս օրւան տւել էին ե°ւ կազմակերպւածութիւն ե°ւ շքեղութիւն:
Խօսք առնողների շարքում էր Թաւրիզի մասնաճիւղի հիմնադիր անդամներից՝ անւանի ճարտարապետ Վարուժան Առաքելեանը: Նա վկայակոչելով անցած օրերը, յիշեց 61 տարիներ առաջ գոյութիւն ունեցող դժւարին պայմանները, որոնք սակայն չյուսահատեցրին օրւայ ղեկավարութեանը, որոնց ջանքերով ծնունդ առաւ Հ.Մ.Ա.Կ.ի Թաւրիզի մասնաճիւղը: Նա երախտիքով յիշեց իր հետ այդ օրերին հիմնադրութեան աշխատանքի դերակատարներից՝ Հրայր Մարուխեանին:
Երեկոյի խանդավառութիւնը, Հայրենիքից հրաւիրւած «Արեւիկ» նւագախմբի տիրապետող երաժշտութեամբ եւ ուրախ մթնոլորտի բերումով իր գագաթնակէտին էր հասել, երբ հատւեց նաեւ յատկապէս պատրաստւած տորթը: Ապա, Ատրպատականի Հայոց Թեմի Առաջնորդ՝ Գրիգոր Սրբազան բեմ հրաւիրւելով իր գնահատանքի ու օրհնութեան պատգամը փոխանցեց ներկաներին: Սրբազան Հայրը մի քանի մատնանշումներ կատարեց, հանդիսականներին ներկայացնելով Հիւսիսային Իրանահայութեան պատմական Թեմի առօրեան. «Փոքրաթիւ բայց ուժական այս Թեմը, ներքին եւ արտաքին կրակով բորբոքած հնոցում թրծւած աղիւս է, որ ինչքան էլ մուրճի հարւածներ ստանայ՝ չի փշրւիր», ասաց Սրբազանը, ակնարկելով Ատրպատականցի հայի անընկճելի կամքին եւ դիմադրողականութեանը: Նա իր բարձր գնահատանքը յայտնեց Հ.Մ.Ա.Կ.ի կենտրոնական վարչութեան եւ յատկապէս Թաւրիզի մասնաճիւղին, Թեմից ներս հայ երիտասարդութեան համար ջերմ ու տոհմիկ տուն լինելու մեծ ներդրումի համար: Սրբազանը յատկապէս ասաց. «Արարատ»-ը իր բոլոր մասնաճիւղերով, փայլուն մի համաստեղութիւն է մեր Իրանահայութեան երկնակամարում, որը իր արծաթափայլ պսպղուն շողերով լուսաւորում է կեանքին նոր բացւող մեր երիտասարդութեան ուղին: Իր խօսքի աւարտին, Սրբազան Հայրը բարձր գնահատեց Թաւրիզահայ Աբրահամեան ընտանիքի ջանադիր աշխատանքը, կանգուն պահելու Հ.Մ.Ա.Կ.-ի Թաւրիզի մասնաճիւղը, անունով յիշելով Հենրիկ եւ Նժդիկ եղբայրներին, եւ նրանց ծնողներին, որոնք «իրենց աչքի նման ուշադիր են այս Մասնաճիւղի պահպանմանը», ասաց Սրբազանը:
Սրբազան Հօր պատգամից յետոյ, նրա ձեռամբ գնահատագրեր ստացան Մասնաճիւղին համահայկական 6-րդ խաղերին մասնակցելու համար դէպի Հայաստան ուղեւորութեան իրենց նիւթական օժանդակութիւնը բերած բարերարներ՝ Արա Հրաչեանը եւ Զարեհ Յակոբեանը: Ապա, բեմ հրաւիրւեցին կենտրոնական վարչութեան անդամ Շերլի Աւետեանը, Մասնաճիւղի նախագահ՝ Հենրիկ Աբրահամեանը, Պատգամաւորական Ժողովի ատենապետ՝ Դոկտ. Արա Մելիքեանը, Թեմական Խորհրդի ատենապետ՝ Ռուբիկ Ջանանեանը, որոնք Սրբազան Հօր հետ միասին բաշխեցին յատուկ գնահատագրեր, Թաւրիզում եւ Թեհրանում այս առիթով գործած զոյգ յանձնախմբերի անդամներին:
Քաղցր յուշերի մի շտեմարան դարձաւ սոյն Ուրախ Երեկոն, որը մինչեւ յաջորդ հանդիպում, երկու տարի յետոյ, յիշւելու է իր ջերմութեամբ եւ սրտամօտ ապրումներով:
