Ատրպատական, Ազգային Առաջնորդարան – Ուրբաթ 25 Դեկտեմբեր 2015-ի երեկոյեան ժամը 7-ին, «Արարատ»-ի Կազմակերպութեամբ Թաւրիզի մասնաճիւղի կենտրոնատեղիում, նախագահութեամբ եւ հովանաւորութեամբ Ատրպատականի Հայոց Թեմի Առաջնորդ՝ Գերշ. Տ. Գրիգոր Ս. Եպս. Չիֆթճեանի եւ Թեմական Խորհրդի, պաշտօնական բացումը կատարւեց ամանորեայ տօնավաճառին:
Հ.Մ.Ա.Կ.-ի Վարչութեան բաժանմունքներից՝ մշակութային յանձնախմբի աշխոյժ ու ժրաջան անդամների աշխատանքով, գաղութի տարբեր Միութիւնների եւ Կազմակերպութիւնների, ինչպէս նաեւ անհատների մատուցած ամանորեայ զարդեղէններով կազմւել էր ճոխ տօնավաճառ, «Արարատ»-ի Թաւրիզի մասնաճիւղի սրահում:
Առաջնորդ Սրբազանը, Թեմական Խորհրդի ուղեկցութեամբ այցելեց ցուցադրասեղանները, հետեւելով այս տարւայ զարդային նորութիւններին: Ցուցադրւած հաւաքածոյի մաս էին կազմում նոր տարւայ զարդեղէններ, տօնը խորհրդանշող խմորեղէններ, կերակրատեսակներ, ինչպէս նաեւ հայ տանտիկնոջ խոհանոցի յատուկ պիտոյքներ, որոնք μոլորն էլ կրում էին հայերէն տառերով արձանագրութիւններ եւ կամ հայկական խորհրդանշաններ: Այս տարի կարեւոր բաժին յատկացւել էր նաեւ Հայաստանից բերւած առարկաների, որոնք մեծ հետաքրքրութիւն ստեղծեցին:
«Արարատ»-ի Թաւրիզի մասնաճիւղի ատենապետ՝ Հենրիկ Աμրահամեանը բացատրութիւն տւեց Սրբազան Հօր եւ պաշտօնական հրաւիրեալներին, այս տարւայ հաւաքածոյի բովանդակութեան, ծրագրման եւ դասաւորման աշխատանքների մասին: Նա յատկապէս յիշեց յանձնախմբի անդամների աշխատանքը, Հայաստան գնալով այս տարւայ համար հայկական իրեր եւ ուտեստներ բերելու կամաւոր զոհողութիւնը: Սրբազանը իր գնահատանքը յայտնեց այս առիթով «Արարատ»-ի Վարչութեան եւ բոլոր բաժանմունքներին ու յանձնախմբերին, որոնք հաւաքական աշխատանքով կազմակերպել էին սոյն ցուցադրութիւն վաճառքը, Թաւրիզահայութեանը նախապատրաստելով տօնական օրերի ցնծութեան: Նա յատկապէս շնորհաւորեց կազմակերպող յանձնախմբին, որը տօնական օրերի մթնոլորտը առաւել եւս ջերմացնելու նպաստել էր, սոյն տօնավաճառի այնքան հարուստ տեսականիով: Նշենք, թէ բացման հանդիսութիւնից յետոյ, Սրբազանը եւ Թեմական Խորհրդի ներկայացուցիչները ընթրիքի հիւրը եղան «Արարատ»-ի վարչութեան:
Մինչեւ գիշերւայ ուշ ժամեր, Թաւրիզահայեր այցելեցին «Արարատ»-ի կենտրոնատեղին, դիտելու եւ ընտրելու իրենց նախընտրած տօնական նւէրներն ու այլեւայլ իրերը:
