Բարեկամութեան ամրապնդման ծառի տնկումը
Բարեկամութեան ամրապնդման ծառի տնկման արարողութիւնը տեղի ունեցաւ ուրբաթ 28 դեկտեմբեր 2013 թ.-ի (1392/9/6) առաւօտեան ժամը 10.30–ին՝ «Արարատ» մարզաւանում, բնակեցութեան կազմակերպութեան գործակիցների համագործակցութեամբ։
Իսկական ծրագիրն սկսեց ժամը 11.30–ին, Իրանի իսլամական Հանրապետութեան նախագահի օգնական դոկտ. Էբթէքարի մարզաւան մուտք գործելով։ Ծրագրի առաջին բաժնում տկն. Էբթէքարը հանդիպում ունեցաւ «Կանաց հաւաքականութեան տնօրեն» եւ օդի ապականման դէմ պայքարող Կազմակերպութեան 96- ամեայ նախագահուհի՝ տկն. Մալլահի հետ, որը մարզաւան էր ժամանել անւակառքով։
Այնուհետեւ տկն. Էբթէքարն ու իրեն ընկերակցող պատւիրակութիւնը ինչպէս նաեւ օդի ապականման դէմ պայքարող գործիչները Հայ Մշակութային «Արարատ» Կազմակերպութեան պատասխանատուների հետ, մարզաւանի մանկական խաղավայրում կատարեցին բարեկամութեան ամրապնդման ծառի տնկման արարողութիւնը, որը պատմութեան մէջ արձանագրեցին տեղում ներկայ թղթակիցները, լուսանկարիչներն ու նկարահանողները։
Արարողութեան ներկայ էին Իսլամական խորհրդարանի բնակեցութեան յանձնաժողովի նախագահ դոկտ. Թաբէշը, Թեհրան նահանգի բնական աղբիւրների վարչութեան պետ դոկտ. Աբդինէժադը, բնական աղբիւրների ընդհանուր վարչութեան տեխնիկական բաժնի տնօրէն ճրտգ. Աբազարին,(որը 300-տնկի, նւիրեց «Արարատ» մարզաւանին), ճրտգ. Թահերին նոյն վարչութիւնից, եւ Հարաւային Իրանահայութեան պատգամաւոր պրն. Ռոբերտ Բէգլարեանը։
Ներկայ էին նաեւ Թեհրանի բնապահպանման գործիչներից աւելի քան 100 անձիք, եւ բնապահպանման համակիր 40 քարաթէքա փոքրիկներ։
Ծառի տնկումից յետոյ, բոլորը մէկտեղւելով «Շահբազեան» սրահում, որտեղ փայլում էր նաեւ Ամանորի տօնածառը, նախ ծրագրի հաղորդավար՝ պրն. Իսիկ Իւնանեանսը ողջունելով ներկաներին գնահատեց կազմակերպողներին։ Ապա բարեկեցութեան գործիչների անունից արտայայտւեց դոկտ. Յովակիմեանը։
Այնուհետեւ Հայ Մշակութային «Արարատ» Կազմակերպութեան կենտրոնական վարչութեան անունից փոխ-նախագահուհի տկն. Արմինէ Սէթխանեանը շնորհակալութիւն յայտնելով ներկաներին այս ծրագրին մասնակցելու համար, ասաց.« Հողը, ծառը, ծաղիկն ու այն ինչ որ կանաչ է, կեանք ու կենսունակութիւն են խորհրդանշում եւ մենք ուրախ ենք, որ դոկտ. Էբթէքարը բարեկամութեան ամրապնդման ծառատնկութեան նախագիծը մեր տան մէջ իրագործեց։ Այն ինչ, որի սերմն ու տունկն է ամփոփւում այսօր հողի մէջ, տարիներ անց դառնալու են բարեկամութեան դալար խորհրդանիշը։
«Այսօր, երբ այս համալիրում հիւրընկալում ենք ձեզ, յուսով ենք ծանօթանալով դրա տարածքներին ու կառոյցին, մարզաւանի համալիրը ցանկագրէք ձեր բարեկարգման եւ բարեկեցութեան իրագործումների ցուցակի մէջ ու այդպիսով մեզ օգնէք, որպէսզի մշակութային եւ մարզական աշխատանքների կողքին աւելի աճեցնենք այս համալիրի ցանկալի կանաչապատ տարածքները։
« Ամուր կառոյցների պահպանումը, ջրի առատութիւնից օգտագործելը, իւրաքանչիւր շրջանի համար մաքուր, առողջ ու առողջապահական տարածքների ստեղծումը եւ տարածքային հնարաւորութիւններին ձեռնահասութիւն ունենալը, երաշխաւորւում է բարոյական եւ նիւթական աջակցութիւններով։
«Ժամանակի անցումը այս համալիրի պահպանումը աւելի է դժւարացնում մեր համար, եւ այս ընթացքով մեզ չի յաջողւի կատարեալ կերպով ի կատար ածել մեր առաքելութիւնը, եթէ այս երկրի սրտցաւ, աշխատունակ եւ խելամիտ պատասխանատուները չաջակցեն մեզ այս կարեւոր հարցում։
«Սիրելի բարեկամներ, մեր խորազգաց շնորհակալութիւնները յայտնելով այս գեղեցիկ եւ նպատակասլաց առիթը ստեղծելու համար, յոյսով եմ որ յարատեւ դառնայ այս ամրապնդումը եւ միշտ միմեանց կողքին, օգտակար հանդիսանանք երկուստեք»։
Այնուհետեւ դոկտ. Թաբէշը իր խօսքի մէջ շնորհակալութիւն յայտնելով ընդունելութեան համար, շնորհաւորեց Ամանորեան տօները։
Ապա Սպահանի եւ Հիւսիսային Իրանահայութեան պատգամաւոր պրն. Ռոբերտ Բէգլարեանը բեմ հրաւիրւելով, շնորհակալութիւն յայտնելով դոկտ. Էբթէքարի եւ իրեն ընկերակցողներին այցելութեան համար, յայտնեց թէ խորհրդարանում պաշտպանելու է բոլոր այն օրէնքի նախագծերը, որոնք նպաստում են բնակեցութեան բարելաւմանը։
Այնուհետեւ տկն. Էբթէքարը բեմ բարձրանալով, իր յարգանքի զգացմունքները յայտնելով Յիսուս Քրիստոսին եւ Նրա հետեւորդներին, շնորհաւորեց այդ բարեբաստիկ Ծնունդի առիթով եւ առողջութիւն ու խանդավառութիւն մաղթեց բոլոր Քրիստոնեաներին։
Տկն. Էբթէքարը բարեկամութեան ամրապնդման ծառատունկը զետեղելու ժամանակ թղթակիցներին ասաց.–«Աստւածային կրօնների միջեւ միասնութիւնները բազմաթիւ են, որոնցից կարեւորագոյններն են առաքինութիւնը, խաղաղութիւնը, բարեկամութիւնն ու մարդկութիւն, եւ այս առիթով էլ ժողովրդական կազմաւորումները այսօր Հայ հայրենակիցների հետ միասին մանկական խաղավայրում ծառատնկութիւն կատարեցինք»։
Նա ապա ակնարկելով Թեհրան քաղաքի կենսոլորտի բնապահպանման դժւարութիւններին, ոչ – Մուսուլման հայրենակիցներին եւս կոչ արեց այս ասպարէզում լուրջ գործակցութիւն ցուցաբերեն։
Վերջում կենսոլորտի մաքրութեան ոլորտում գործունէութիւն ծաւալած անձանց գնահատագրեր տրւեց, եւ նրանց շարքում՝ Դոկտ Բարիս Մեջնունեանին, Հենրիկ Մեջնունեանին, դոկտ. Տիգրանուհի Յուակիմեանին, Սուրէն Ստեփանեանին եւ մի շարք ուրիշ անհատների։
Վերջում տեղի ունեցաւ ընդունելութիւն։
