Չորեքշաբթի Ապրիլի 19 – ի 2017թ. երեկոյեան ժամը 8:00- ին տեղի ունեցաւ Երէցների միութեան անդրանիկ միջվարչական հանդիպումը , բաժանմունքների վարչական ընկերների ներկայութեամբ:
Երէցների միութեան նախագահ՝ ընկ.Հարմիկ Զովէլեանը ամփոփ զեկոյց ներկայացրեց Նոր տարւայ և Գարնանային վաճառքի նիւթական և բարոյական աշխատանքների մասին Նաև բացատրութիւններ տւեց յառաջիկայ աշխատանքների՝ Երէցների միութեան ուղեգծի և յանձնախմբերի գործունէութեան ուղղութեամբ, եղան մտքերի փոխանակում անցեալի և ապագայի ա շխատանքների մասին :
Ջերմ և մտերմիկ մթնոլորտում , տեղի ունեցաւ աւանդական հաւկիթախաղ ,ընկերները ճաշակեցին զատկական ընթրիքը , ինքնաբուխ հնչեցին գեղեցիկ երգեր և արտասանութիւններ:
Երէկ, Ապրիլի՝ 21-ին, «Կոմիտաս» սրահում տեղի ունեցաւ Հ.Մ.Ա.Կ. -ի Սկաուտական միութեան Հայոց Ցեղասպանութեան նւիրւած ձեռնարկը: Միջոցառմանը ներկայ էին՝ քաղաքական գործիչ եւ թրքագէտ ընկեր՝ Գրիգոր Ղազարեանը, ծնողներ, եւ սկաուտները:
Վերոյիշեալ ձեռնարկը ներկայների մօտ արթնացրեց պահանջատիրական ոգին:
Միջոցառումն աւարտւեց ծառայելով իր առաքելութեանը:
միջոցառում նւիրւած Հայոց Ցեղասպանութեան 102-րդ տարելիցին
Այսօր չորեքշաբթի ապրիլի 19-ի առաւօտեան թեհրանի հայոց դպրոցների միջնակարգ օղակների աշակերտ-ուհիները ներկայ գտնւեցին մարզաւան , մասնակցելու Թեհրանի հայոց թեմի Կրթական խորհրդի կողմից կազմակերպւած
միջոցառմանը, նւիրւածՀայոց Ցեղասպանութեան 102-րդ տարելիցին.
ծրագրում կար` ֆիլմի ցուցադրում,երգչախմբային, նւագարանների , մեներգների ու ասմունքների կատարումներ:
Աշակերտութիւնը մեծ բաւարարութեամբ թողեց«Սասունցի Դաւիթ» սրահը :
Եւրոպայի բասկետբոլի առաջնութեանը մասնակցող Հայաստանի Հանրապետութեան 6 թիմերը համալրելու նպատակով, չորեքշաբթի Ապրիլի 12-ից Հ.Մ.«Արարատ» Կ.-ի հրաւէրով Թեհրան էր ժամանել Հ.Հ. Սպորտի նախարարի խորհրդական եւ բասկետբոլի Ազգային հաւաքականի պատասխանատու կազմի անդամ՝ պրն. Եղիշ Դաւթեանը:
«Արարատ»-ի նախաձեռնութեամբ 2 ընտրական փորձերի հրաւիրւեցին Թեհրանի եւ Նոր Ջուղայի հայոց զանազան միութիւններում եւ ոչ հայկական մարզական ակումբներում պարապող եւ տարիաքային պայմանները լրացնող հայ մարզիկները: Կազմակերպւած փորձերի ընթացքին պրն. Դաւթեանը փորձնական հայեացքով ականատեսը դարձաւ մարզիկ-ուհիների խաղին ու իր նախատեսած պայմանները լրացնող 10 բասկետբոլիստների ընտրեց շուրջ 80 մասնակիցների ընդմիջից, ընդ որում Իրանի 10 հոգանոց ցանկը կը համալրի ԱՄՆ-ից եւ Ռուսաստանից ստացւած անւանացանկը, ինչը ՝ Ազգային Հաւաքականի պատասխանատու կազմի կողմից համեմատական վերաքննութեան ենթարկւելով՝ արժանաւորների ընտրանին վերջնական կը դառնայ միանալու Հայաստանի կողմից ներկայացւելիք Ազգային Հաւաքականին:
Լիայոյս ենք, որ իրանահայ մարզիկներին կը յաջողի գրաւել մարզիչների ուշադրութիւնը:
Հ.Մ.«Արարատ» Կ.-ի Հանրութեան հետ կապ
Ապրիլի 14-ը և մեր ակտիւ միութիւնը
Հ.Մ.Ա.Կ-ի Սկաուտական միութիւնը իր նոր շրջանը սկսել է ակտիւ աշխատանքներով:
Ուրբաթ ապրիլի 14-ին տեղի ունեցաւ Սկաուտական միութեան ընդհանուր պարատ որին յաջորդեց, երրորդ կարգ-ի գործնական քննութիւնը, նաև ընթացաւ Ապրիլ 24-ին նւիրւած ներքին ձեռնարկի նախապատրաստական աշխատանքները:
« Ա Ւ Ր Ո Ր Ա »
ԵՐԷՑՆԵՐԻ ՄԻՈՒԹԵԱՆ ԱՊՐԻԼԵԱՆ ՁԵՌՆԱՐԿ
Երկուշաբթի, ապրիլի 10-ին, տեղի ունեցաւ ՀՄԱԿ-ի Երէցների միութեան ապրիլ ամսւայ հանդիպումը՝ միութեան անդամների եւ նրանց հիւրերի ներկայութեամբ:
Ապրիլը, ինչպէս միշտ, յագեցւած է լինում բազմաթիւ ու բազմապիսի ձեռնարկներով: Երէցների միութեան ապրիլեան հանդիպումը եւս բացառութիւն չէր կազմում:
Ծրագրից առաջ, կանանց ու մայրերին մեծարելու համար, վարչութեան կողմից շնորհաւորում էին դահլիճ մտնող կանանց տօնը եւ նրանց նւիրում Երէցների միութեան մակագրութեամբ ստւար մի հատոր՝ «Հայուհին պատմութեան առջեւ» խորագրով:
Գիրքը հեղինակել է Հայր Վարդան Հացունին, առաջին անգամ լոյս է տեսել Վենետիկում, վերահրատարակել է Թեհրանի հայ կանանց բարեգործական ընկերութիւնը՝ Տէր Սեպուհ արք. Սարգսեանի նախաբանով, 2009 թւականին:
Ծրագրի բացումը կատարեց միութեան նախագահ՝ ընկեր Հարմիկ Զովէլեանը: Նա սկզբում շնորհաւորեց կանանց ու մայրութեան տօնը, յիշատակի խօսք ասաց Մեծ Եղեռնի տարելիցի առթիւ, ապա ընթերցեց միութեան երեք բաժանմունքների նորընտիր վարչութիւնների անւանացանկը: Վերջում հրաւիրեց աշակերտուհի՝ Մինէ Թաhմասեան՝ կատարելու «Մայրիկ» անունով հոգեպարար մի երգ: Այնուհետեւ, վարչութեան անդամ՝ ընկեր Դիանա Տէր-Յովսէփեանը նոյնպէս շնորհաւորելով ներկայ մայրերի տօնը, անդրադարձաւ օրւայ ծրագրին:
Բուն ծրագրին անցնելով՝ ցուցադրւեց 1918 թւականին նկարահանւած «Հոգիների աճուրդ» սեւ-սպիտակ ու համր ֆիլմի տեսարաններից պատրասրւած՝ 24 րոպէ տեւողութեամբ մի տեսահոլովակ՝ անգլերէն մակագրութեամբ, համապատասխան բացատրութիւններով:
«Հոգիների Աճուրդ» կինոնկարը Եղեռնի սարսափները ապրած Արշալոյս Մարտիկեանի կեանքի պատմութիւնն էր, իր իսկ մասնակցութեամբ նկարահանւած Հոլիվուդում, որը ցաւօք անհետացել է, միայն գտնւած մի հատւածից օգտւելով պատրաստւել է ցուցադրւած տեսահոլովակը:
Ծրագրի ընթացքում ներկայացւեց Արշալոյս Մարտիկեանի կեանքը, ով մինչեւ 14 տարեկան ապրում էր Արեւմտեան Հայաստանի Խարբերդ նահանգի Չմշկածագ գիւղաքաղաքում՝ բարեկեցիկ մի ընտանիքում. ապա սկսւում է 1915 թւականի Ցեղասպանութեան զարհուրելի արհաւիրքը, ամբողջապէս տեղահանւում է շրջանի հայութիւնը, Արշալոյսը կորցնում է իր բազմամարդ ընտանիքի անդամներին, ընկնում է թուրքի ու քուրդի հարեմներ, ապա փախչելով՝ լեռնային ճանապարհներով հասնում է Էրզրում, որն այդ օրերին գտնւում էր ռուսական զօրքերի վերահսկողութեան տակ: Էրզրումում, Արշալոյսը հանդիպում է Զօրավար Անդրանիկին ու պատմում է թէ ինչպես ինքը ականատես է եղել թուրք դահիճների բարբարոսութիւններին եւ հայ ժողովրդի բնաջնջմանը: Անդրանիկ Զօրավարի աջակցութեամբ նա յաջողում է հասնել Թիֆլիս, այնտեղից՝ Մերձաւոր Արեւելքի հայ որբերի օգնութեան ամերիկեան կոմիտէի օգնութեամբ հասնում է Պետրոգրադ, ապա Օսլօ եւ վերջապես Ամերիկայի Միացեալ Նահանգներ՝ Նիւ Եօրք:
Արշալոյսը իր հօրեղբօրը գտնելու միտումով 1917-ին մի յայտարարութիւն է տպագրում «Նիւ Եօրք» թերթում, որը գրաւում է ամերիկացի երիտասարդ բեմագիր Հարւի Գէյթսի ուշադրութիւնը, ով ցանկանաում է գրի առնել նրա պատմութիւնը:
Այդ պատմութիւնը լոյս է տեսնում 1918-ին, անգլերէն լեզւով, «Յօշոտւած Հայաստան» (Ravished Armenia) խորագրով, որի կազմին Արշալոյսն էր պատկերւած աւանդական տարազով եւ Աւրորա Մարդիգանեան անունով (Աւրորա նշանակում է արշալոյս): Այդ տարիներին, «Յօշոտւած Հայաստան» գիրքը անգամներ վերահրատարակւում է:
«Յօշոտւած Հայաստան»-ը նոյն թւականին վերածւում է կինոնկարի՝ «Հոգիների աճուրդը» անունով որտեղ ցուցադրւում է այն բարբարոսութիւնները, որոնց ենթարկւել էր հայ ժողովուրդը:
կինոնկարը առաջին անգամ ցուցադրւում է 1919-ի յունւարին Վաշինկտոնում:
Հայոց ցեղասպանութեանը նւիրւած այդ առաջին գեղարւեստական ժապաւէնի գլխաւոր դերում յայտնւում է ինքը՝ Արշալոյսը: Նկարահանումները տեւում են շուրջ երկու ամիս: Ժապաւէնը մեծ յաջողութիւն է ունենում, որի հասոյթից 30 միլոն դոլար տրամադրւում է Մերձաւոր Արեւելքի 60 հազար հայ որբերի կենսապահովման գործին:
ֆիլմը մեծ յաջողութեամբ ցուցադրւում է ԱՄՆ-ի 25 նահանգների խոշոր քաղաքներում, Անգլիայում, Լատին Ամերիկեան երկրներում եւ այլուր:
Սակայն կինոնկարի եւ Աւրորայի փառքը երկար չեն տեւում: 1920-ական թւականներին, ինչ-ինչ պատճառներով, ֆիլմը դադարում է ցուցադրութիւնից, նոյնիսկ անհետանում է արխիւներից: Գիրքը եւս հանւում է գրատներից, իսկ Արշալոյսը, որ 1928-ին ամուսնանում է իր նման վտարանդու հետ, մեկուսացւած կեանկով անց է կացնում բովանդակ կեանքը: Նա մահանում է 1994-ին՝ 93 տարեկան հասակում:
Կինոնկարից գտնւել է միայն 18 րոպէանոց մի հատւած, որից օգտւելով պատրաստւել է 24 րոպէ տեւողութեամբ մի տեսահոլովակ՝ անգլերէն մակագրութեամբ: Այդ տեսահոլովակը ցուցադրւեց դահլիճում՝ համապատասխան բացատրութիւնով:
Ցուցադրւեց նաեւ 2015-ին հիմնադրւած «Աւրորա» համաշխարհային մարդասիրական մրցանակի տեսահոլովակներից հատւածներ: Մրցանակը «Աւրորա» մարդասիրական նախաձեռնութեան նախագծերից մէկն է, որ ի յիշատակ Արշալույս Մարտիկեանի խիզախութեան ու ոգեշնչող պատմութեան, ստացել է «Աւրորա» անւանումը:
Համաշխարհային մարդասիրական մրցանակի նպատակն է արժանին մատուցել մեր օրերի հերոսներին եւ գնահատել այն բացառիկ ազդեցութիւնը, որ նրանց գործունէութիւնն ունեցել է մարդկային կեանքի պահպանման եւ մարդասիրական գործն առաջ մղելու հարցում։
Մրցանակը շնորհւում է ամէն տարի եւ յանձնւում է այն անհատներին, որոնց ջանքերի շնորհիւ փրկւել են բազմաթիւ մադկային կեանքեր: Անդրանիկ մրցանակը յանձնւեց 2016-ի ապրիլի 24-ին Մարգրիտա Բարանկիցէին, ով տեսնելով հանդերձ իր եօթ երեխաների մահը, մօտ 30 հազար երեխայի կեանք է փրկել Բուրունդիի ցեղասպանութեան ժամանակ: «Աւրորա» մարդասիրական 2-րդ մրցանակի արարողութիւնը տեղի կունենայ 2017-ի մայիսի 28-ին:
Ծրագրի աւարտին ներկաները հիւրասիրւեցին միութեան բաժանմունքների պատրաստած ուտեստներով: Նշւեցին ապրիլ ամսւայ տարեդարձները: Նաեւ միութեան վաստակաւոր անդամներից մէկի առաջարկով նշւեցին ամսւայ տօները:
Նիւթը պատրաստել է Էդւարդ Յարութիւնեանը:
Հ.Մ.Ա.Կ.-Ի Հանրութեան հետ կապ