Կենտրոնական Վարչութիւն
ՀՄԱԿ-ի 80-ամեակի առիթով, Կենտրոնական վարչութեան կողմից կեանքի էր կոչւել յանձնախումբ Հայաստանում՝ նշելու Արարատի 80-ամեակը, հետևեալ կազմով՝ Կարինէ Ղարախանեան, Թալին Բաղումեան, Ռուբինա Գալստեան, Ռաֆիկ Բաղումեան, Արինէ Զոհրաբեան, Սերոժ Մատթէոսեան և Քրիստինէ Արզումանեան:
Այս յանձնախումբն իր հերթին, կեանքի կոչեց դաշտահանդէսի յանձնախումբ հետևեալ կազմով՝ Ալէն Ասատրեան, Շուշիկ Աբրահամեան, Արթուր Ջրաղացպանեան, Արսինէ Կարապետեան, Արսինէ Սեփանեան, Սիոնա Մարտիրոսեան, Սևան Ծառուկեան, Նւարդ Քեշիշեան:
Յուլիսի 14-ին Հայաստանի Արևիկ հանգստի գօտում, տեղի ունեցաւ ՀՄԱԿ-ի 80-ամեակի առիթով կազմակերպւած դաշտահանդէսը, որին մասնակցում էր աւելի քան 300 հոգի՝ արարատականներ և Արարատի բարեկամներ:
Երբ արդէն համարեայ բոլորը հաւաքւել էին հնչեց Արարատի հիմնը, ապա Կարինէ Ղարախանեանը ընթերցեց 80-ամեակը նշող Հայաստանի յանձնախմբի խօսքը.-
Հայաստանում ՀՄԱԿ-ի 80-ամեակը նշող յանձնախմբի խօսքը՝ նոյն առիթով կազմակերպւած դաշտահանդէսում
«Արարատ» Կազմակերպութեան սիրելի ընկերներ և բարեկամներ,
Բարի էք եկել:
Հ.Մ. «Արարատ» Կազմակերպութեան 80-ամյակը նշող Հայաստանի յանձնախմբի անունից, շնորհակալութիւն եմ յայտնում բոլորիդ, որ անսալով մեր հրաւէրին, մէկ անգամ կրկին հաւաքւել էք միասնաբար նշելու մեր սիրելի Արարատի՝ մեր երկրորդ տան 80-ամեակը և յիշելու մեր երանելի օրերը, որոնք անցան այդ հարազատ յարկի տակ:
Ամէն ինչից առաջ, եկէք յիշենք բոլոր ընկերներին՝ հիմնադիրներից սկսած մինչև ընթացիկ տարում մեզնից առյաւետ հեռացած ընկերներին, որոնցից իւրաքանչիւրն իր հետքն է թողել այս կազմակերպութեան գործունէութեան վրայ: Չենք կարող անշուշտ յիշատակել նրանց բոլորի անունները, որովհետև բազմաթիւ են նրանք, սակայն մէկ րոպէի ընթացքում ամէն մէկս իր մէջ թող վերյիշի նրանց՝ մարզիկներ, սկաուտներ, արւեստի սպասաւորներ թէ անխոնջ երէցներ՝ անուն առ անուն:
Մէկ րոպէ լռութեամբ յարգենք յիշատակը առյաւէտ հեռացած բոլոր ընկերների:
**
60-ամյակից սկսած, աւանդույթ է դարձել, կլոր ամեակները նշել նաև Միացեալ Նահանգներում և Հայաստանում, ուր հաւաքւած են բազմաթիւ արարատականներ:
Այս հաւաքները առիթ են, որ ուրախ մթնոլորտում միմեանց վայելելուց բացի, մեր երախտագիտութիւնն արտայայտենք այն Կազմակերպութեանը, որն իր յայտարարած նպատակի համաձայն կրթել ու դաստիարակել է մեզ:
Արարատ Կազմակերպութեան նպատակի մէջ կարդում ենք՝
«Առանց Հայ Դատի նպաստաւոր լուծման՝ այն է ՝ ողջ հայութեան ազատ անկախ և ամբողջական իր հայրենիքի մէջ համախմբւելու կարելիութեան, նրա բարգաւաճման և ինքնահաստատման ուղղութեամբ թափւող ջանքերը, մասնաւորապէս սփիւռքեան պայմաններում, իզօրու չեն ակնկալւած արդիւնքները ապահովել»: Ապա հաստատում է, որ պէտք է ՝ «զօրավիգ կանգնել Հայաստանի և Արցախի պետականութեանց ամրապնդման և հզօրացման գործին»:
Այսօր մեզանից իւրաքանչիւրը՝ ուր էլ որ լինի նա, կրողն է այս նպատակի և իր կարողութեան սահմաններում փորձում է արդարացնել այն:
Իսկ մեր սիրելի Կազմակերպութիւնը, իր անւան նման անփոփոխ նպատակով, մէջքը յենած Արագածին և հայեացքը ուղղած Արարատ լեռան գագաթին, շարունակում է իր երթը՝ կրթելով նոր սերունդներ, որոնք գալու են փոխարինելու աւագներին՝ շարունակելով նոյն ուղին:
Կեցցէ՝ Հ.Մ. «Արարատ» Կազմակերպութիւնը
Կեցցէ՝ Հայ ժողովուրդը
Հայ Մշակութային
«Արարատ» Կազմակերպութիւնը
դարձաւ 80 տարեկան
2024 թ․-ի Յուլիսի 4-ի երեկոյեան «Արարատ»-ի անդամների մասնակցութեամբ «Արարատ» մարզաւանում տեղի ունեցաւ Կազմակերպութեան 80-րդ տարեդարձի միջոցառումը նախաձեռնութեամբ Կենտրոնական վարչութեան միջոցով կեանքի կոչւած 80-ամեակի յանձնախմբի միջոցով։
Ծրագիրը մեկնարկեց կազմակերպութեան Հիմներգով, ապա բացման խօսքով հանդէս եկաւ Սկաուտ վարիչ
առաջնորդ՝ Վանէ Պօղոսեանը, այնուհետև 80-ամեայ յանձնախմբի նախագահ՝ ընկեր Համլետ Խալոյեանը օրւայ խօսքը ընթերցեց, որին յաջորդեց Կենտրոնական վարչութեան նախագահ՝ ընկեր Սոֆի Ջաղարբէգեանի օրւայ առիթով արտայայտութիւնները։
Օրւայ հաղորդավարն էր ընկեր Արտոյտ Զոհրաբեանը։
Մեծ էկրանից ցրւեց Արարատի մասնաճիւղերի նախագահների, Հայաստանում և ԱՄՆ-ում նոյն առիթով կեանքի կոչւած յանձնախմբերի ներկայացուցիչների պատգամները։
Տարածքը զարդարւել էր գեղեցիկ և տօնական։
Սկզբում և ընթացքին ցրւեց ամփոփ պատկերներից տեսաերիզ կազմակերպութեան անցեալից ու ներկայից պստրաստւած։
Կարկանդակի հատման արարողութեան սկզբին հիմնադիր ընկեր Առաջին Արծւիկ այժմ 101 ամեայ՝ Յասմիկ Թումանեանի բարեմաղթանքները հնչեցին ապա իր կողքին կանգնեցին վետերան ընկերներ՝ Թորիկ Թորիկեանը և Էլպիս Արզումանեանը, Կենտրոնական վարչութեան նախագահ ընկեր Սոֆի Ջաղարբէգեանը և նոր սերնդի, որպէս ներկայացուցիչ մի Գայլիկ ու գեղեցիկ հրավառութեան ներքոյ հատեցին կարկանդակը։
Ջերմ պահերի ընթացքին ամրագրւեցին յիշատակի լուսանկարներ օրւայ կարկանդակի շուրջ։
Հետաքրքիր ու ակտիւ խաղերով զբաղւեցին միութիւնները։
Պատրաստւել էր հիւրասիրութիւն, ընթրիք, ուրախ մթնոլորտում միջոցառումը շարունակւեց մինչ ուշ գիշեր։
Ամենուր հնչում էր՝
" Արարատ"
տարեդարձդ շնորհաւոր,
քեզ մաղթում ենք բազում բեղուն տարիներ՝
կանաչ ճանապարհով քայլելու ոյժ, կամք ու աւիւն։
2024 թւականի յունիսի 19-ին, Գործարար պրն Գագիկ Ծառուկեանը Թեհրան կատարած երկօրեայ անձնական այցի ընթացքին Արարատ մարզաւան այցելեց։
Պրն Ծառուկեանին դիմաւորեցին Կենտրոնական վարչութեան նախագահ ընկեր Սոֆի Ջաղարբէգեանը, կազմի ընկերներն ու Վարիչ մարմնի նախագահը, ներկայ էին նաև Ալիք հաստատութեան ներկայացուցիչները: Գրասենեակում կարճ հանդիպման ընթացքին բացատրուիւնների ներքոյ պրն Ծառուկեանը ծանօթացաւ կազմակերպութեան ընթացիկ ու ապագայ աշխատանքների մասին և տեղեկութիւններ ստացաւ Արարատ Կազմակերպութեան հիմնադրման 80-ամեակին նւիրւած ծրագրերի շարանից։
Հինգշաբթի, 2024 թւականի մայիսի 30-ին, Թեհրանի միջազգային ցուցահանդէսի դահլիճում տեղի ունեցաւ միջոցառում՝
Թեհրանում ակումբների ստեղծման 100-ամեակի առիթով, ուր մեծարւեցին ամենավաստակաւոր և գործունեայ միութիւնները։
Միջոցառմանը ներկայ էր երկրի Մարզանքի ու Երիտասարդութեան նախարարը, պաշտօնական այրեր և մարզանքի ոլորտում պետական բարձրաստիճան հիւրեր։
Հրաւիրւել էին Թեհրանում աշխատող ակումբները, որոնց թիւը ըստ տրւած զեկոյցի շուրջ 3500-ի է հասնում։
Միջոցառումը մեկնարկեց հիւրընկալը, որտեղ օրւայ առիթով իր խօսքը արտայայտեց, ապա Մարզանքի նախարարը ողջունեց ներկաներին և բացատրութիւններ տւեց ներկայ իրավիճակի մասին, խոստանալով իր ուժերի և հնարաւորութիւնների սահմանում օգտակար լինել մարզական ակումբներին, ունենալու համար նոր մարզաձևեր զարգացնելով եղածը, ապա ներկայացւեց ու մեծարւեց 12 վաստակաւոր և լաւագոյն ակումբները, որոնց յանձնւեց գնահատագրեր ու յիշատակներ։
Ցանկի առաջին երկուսի մէջ են «Շահին»-ը և «Արարատ»-ը, որոնք էլ գնահատւեցին, որպէս
ամենափորձառու, վաստակաւոր, անւանի և բազմաբնոյթ մարզաձևերում աշխատող ակումբներ։
Միջոցառման ընթացքին յիշատակւեց և մեծարւեց Արարատի գործունէութեան 80-ամեակը։
Հարկ է նշել, որ միջոցառման համար պատրաստւած տեսաերիզում մեծ տեղ էր գտնում Արարատ կազմակերպութեան աշխատանքները։
«Արարատ» Կազմակերպութեան կողմից մեծարմանը հրաւիրւել և մասնակցել էին Կենտրոնական վարչութեան նախագահ՝ ընկեր Սոֆի Ջաղարբեգեանը, փոխ նախագահ՝ ընկեր Արմանդ Դրորը, ընկեր Թալին Դարասեանը և վաստակաւոր մարզիկներ ու մարզիչներ՝ ընկերներ Մայիս Միանսեանը, Արսէն Տ․Գէորգեանը և Յովիկ Հաթամզադէն։
Շաբաթ, յունիսի 16-ին ՀՄԱԿ-ի Կենտրոնական վարչութեան նիստին մասնակցեցին, կազմակերպութեան Թաւրիզի մասնաճիւղի վարչութեան նախագահ՝ ընկեր Նժդեհ Աբրահամեանը, վարչութեան անդամ ընկեր Վահիկ Բաղդասարեանը և ՀՄԱԿ-ի Թաւրիզի մասնաճիւղի բազմամեայ անդամ ու Ատրպատականի Հայոց Թեմի Թեմական Խորհրդի անդամ ընկեր Հենրիկ Աբրահամեանը:
Ընկեր Նժդեհը զեկուցեց այս շրջանի ընթացքում կատարւած աշխատանքների, եղած մտահաոգութիւնների և մի շարք դժւարութիւնների մասին:
Հանդիպման ընթացքում նաև ներկայ եղաւ ՀՄԱԿ-ի հիմնադրման 80-ամեակի յանձնախմբի նախագահ՝ ընկեր Համլետ Խալոյեանը, որը մանրամսնօրէն խօսեց տարբեր ծրագրերի մասին և քննարկւեց հնրաւոր միասնական աշխատանքների վերաբերեալ:
Երեքշաբթի, ապրիլի 30-ին Արարատի Կենտրոնական վարչութիւնն իր հերթական նիստում հանդիպեց Արարատ Կազմակերպութեան հիմնադրման և գործունէութեան 80-ամեակի առիթով կեանքի կոչւած յանձնախմբին։
Հանդիպման սկզբին Կենտրոնական վարչութեան նախագահ՝ ընկեր Սոֆի Ջաղարբէգեանն ողջունեց կազմին ապա կազմի նախագահ՝ ընկեր Համլետ Խալոյեանն յայտնեց պատկան առիթով կազմւած ծրագրերն ու միջոցառումը։
Երկուստեք խօսակցութեան ընթացքին եղան առաջադրանքներ։
Յաջողութեան մաղթանքներով աւարտւեց հանդիպումը։
Ուրբաթ, 2024 թ.-ի մարտի 8-ի առաւօտեան «Արարատ» մարզաւանի հիւսիսային հատւածում տեղի ունեցաւ Ծառատնկման ծրագիր նւիրւած՝ Հ.Մ. «Արարատ»Կ.-ի հիմնադրման և գործունէութեան 80-ամեակին և Արարատ մարզաւանի կառուցման 50-ամեակին։ Նշենք, որ երկիր մոլորակը մաքուր և առողջ պահելու միջոցներից մէկը՝ Ծառատնկման աւանդական այս ծրագիրը բազմամեայ անցեալ ունի կազմակերպութեան յարկի ներքոյ, որը կատարւում է ամէն տարի։
Տարածքում, մասնակիցներին ջերմօրէն դիմաւորում էին Մարզաւանի Վարիչ մարմնի անդամները։
Ծրագրի սկզբում «Արարատ» Կազմակերպութեան հիմնադրման և գործունէութեան 80-ամեակի յանձնախմբի նախագահ՝ ընկեր Համլետ Խալոյեանը ողջունելով ընկերներին բացատրեց օրւայ բովանդակութեան մասին, այնուհետև հրաւիրեց միութիւնների ու մարմինների ընկերներին ու վարչականներին, որոնց մէջ ընդգրկւած էին ԻԻ խորհրդարանում Թեհրանի և հիւսիսային իրանահայութեան պատգամաւոր, Կազմակերպութեան անդամ՝ Արա Շահվերդեանն, 80 տարիքը լրացրած վաստակաւոր ընկերներ, վարչականներ ու կրտսեր անդամներ, ովքեր
նախապէս պատրաստւած փոսերում մէկը միւսի հետևից տնկեցին նւիրւածութեանը համապատասխան՝ 80 դալար տնկիներ իսկ զրնգուն բահերն ու նոր ցնցուղներն էլ ձեռքից ձեռք շրջելով օգնում էին տնկին հողում ամրացնելու գործում։
Աւարտին Կենտրոնական վարչութեան նախագահ ընկեր Սոֆի Ջաղարբէգեանն օրւայ առիթով արտայայտւեց և ընթերցեց տեղակայւելիք յուշատախտակի բովանդակութիւնն ապա 80-ամեակի յանձնախմբի նախագահի հետ պուրակում տեղադրեցին օրւան համապատասխան յուշատախտակն՝ այն էլ մարզաւանի կառուցմանը իւրայատուկ՝ ամպագոյն քարակտորի վրայ։
Ջերմ մթնոլորտում ամրագրւեցին բազմաթիւ լուսանկարներ։
Մի խօսքով բնութիւնն ու ընկերութիւնը՝ Երէց ու կրտսեր համատեղւել էին օրւայ գարնանային հաճելի եղանակին ու վայրը թողնելու ցանկութիւն դեռ երկար ժամ չկար իսկ նոյն միջոցին ընկերները հիւրընկալւում էին համեստ հիւրասիրութեամբ։
ՀՄԱԿ-ի Հանրութեան հետ կապ
2024 թ.-ի փետրւարի 6-ին Հ.Մ.«Արարատ»Կ.-ի Արարատ մարզաւանի Վարիչ մարմնի հրաւէրով տեղի ունեցաւ պաշտօնէութեան համար
ընթրիք երեկոյ մարզաւանի «Տնակ»-ում։
Սկզբում Կազմակերպութեան նախագահ՝ ընկեր Սոֆի Ջաղարբէգեանը ողջունելով ներկաներին յղեց իր շնորհակալական խօսքերը ապա մարզաւանի Վարիչ մարմնի նախագահ՝ ընկեր Նորիկ Մանասերեանը օրւայ առիթով արտայայտւեց ու բարեմաղթանքներով ուրախ ժամանց ցանկացաւ հիւրերին։
Ջերմ ու հարազատ մթնոլորտում հիւրերը վայելեցին կազմակերպւած խնջոյքը։
Չորեքշաբթի, 24 յունւարի 2024 թ․-ի առաւօտեան ՀՄԱԿ․-ի Կենտրոնական վարչութեան հրաւէրով «Արարատ» մարզաւանում հիւրընկալւեց Թեհրանի 3-րդ մասի Քաղաքապետ պրն. Ջաւանին և նոյն քաղաքապետարանի այլ պաշտօնակատարներ, որոնց դիմաւորեց Կենտրոնական վարչութեան նախագահ՝ ընկ․Սոֆի Ջաղարբէգեանը և Կենտրոնական վարչութեան անդամներ՝ Արմանդ Դրորը և Ժորժ Աղայեանը և ընկեր Դարւին Աւագեանը։
Հանդիպման ընթացքին քննարկւեց և Կենտրոնական վարչութեան կողմից փոխանցւեց երախտիքի խօսքեր Արարատ մարզաւանում կատարւած մի շարք վերանորոգմների և շինարարութիւնների կապակցութեամբ։
Եղան երկուստեք խորհրդակցութիւններ և առաջադրանքներ
ի մասնաւորի շեշտադրւեց կառուցւած ջրամբարի և վերանորոգւած հանդերձարանների պարագան։
Այցի արդիւնքում՝ պրն Ջաւանին ցուցաբերել է դրական ու բարիացակամ մօտեցում մարզաւանի տարածքի պահպանման ու մի շարք նորոգութիւններ կատարելու ուղղութեամբ քաղաքապետարանի հնարաւորութիւններից օգտւելու առումով։
Հիւրընկալութեան աւարտին յարգարժան հիւրին յանձնւել է յուշանւէր։
2024 թւականի յունւարի 22-ին Թեհրանի հայոց թեմի առաջնորդ Տէր Սեպուհ արք Սարգսեանն իր գրասենեակում ընդունեց
Հ.Մ. «Արարատ» Կազմակերպութեան Կենտրոնական վարչութեան նախագահ՝ ընկ. Սոֆի Ջաղարբէգեանին։
Կենտրոնական վարչութեան նախագահը փոխանցեց Նոր տարւայ եւ Ս. Ծննդեան տօների առիթով իր և Կազմակերպութեան կողմից շնորհաւորանքները, ապա խնդրեց Սրբազան հօր հովանաւորութիւնը եւ Օրհնութիւնը Հ.Մ. «Արարատ» Կազմակերպութեան հիմնադրման եւ գործունէութեան 80-ամեակին նւիրւած 46-րդ Համադպրոցական խաղերի բացման եւ խաղերի ջահի օրհնութեան առիթով։
Սրբազան Հայրը նաև փոխանցեց իր շնորհաւորանքները և բարձր գնահատեց Կենտրոնական վարչութեան նախաձեռնութիւնն ու յաջողութիւն մաղթեց Համադպրոցական խաղերի կապակցութեամբ:
