Հրատարակութիւն

PDF

Կենտրոնական Վարչութիւն

Դեկտեմբերի 4-ի 2023թ․-ին Արարատ մարզաւանի Վարիչ մարմնի հրաւէրով հանդիպում տեղի ունեցաւ Երէցների միութեան վարչութեան հետ։
Հանդիպման ընթացքին խօսւեց մի շարք աշխատանքներում այդ թւում նաև նոր տարւայ Երէցների բազարի կազմերի համագործակցութեան մասին։
Նոր տարւայ  բազարի գովազդային աշխատանքների բաժինը կատարւում է Վարիչ մարմնի միջոցով։

Ուրախութեամբ տեղեկացանք, որ «Մարիամեան» ազգային տղայոց դպրոցի աշակերտ և ՀՄԱԿ․-ի Արւեստից միութեան անդամ Արեգ Շահվերդեանը, մասնակցելով կայացած 2023 թւականի Ասիայի ռոբոտիկի մրցաշարին, արժանացել է ոսկէ մեդալի։

Շնորհաւորում ենք սիրելի ընկերոջը յաջողութեան համար։

Շաբաթ, 2023 թ.-ի դեկտեմբերի 2-ին,
Հ.Մ. «Արարատ» Կ.-ի Կենտրոնական վարչութիւնը հիւրընկալեց ԻԻ Խորհրդարանում Թեհրանի և Հիւսիսային Իրանում իրանահայութեան պատգամաւոր՝ պրն. Արա Շահվերդեանին։
Հանդիպման սկզբին Կենտրոնական վարչութեան նախագահ՝ ընկեր Սոֆի Ջաղարբէգեանն ողջունեց պատգամաւորին ապա բացատրեց Կազմակերպութեան վերջին ամիսների տարած աշխատանքներն ու ապագայի ծրագրերն, անշուշտ անդրադառնալով ներկայ պայմաններին ու դժւարութիւններին։
Պրն, Արա Շահվերդեանն իր հերթին բարձր գնահատեց Արարատի դերն ու նւիրւած աշխատանքն ապա հանգամանօրէն անդրադարձաւ իր և պատկան գրասենեակի միջոցով համայնքային մասշտաբում տարւող աշխատանքների և առկայ դժւարութիւնների մասին։
Եղան երկուստեք մտքերի փոխանակումներ և առաջադրանքներ։
Աւարտին Կենտրոնական վարչութեան նախագահը շնորհակալութիւն յայտնեց պատգամաւորին, որ միշտ Արարատի կողքին է կանգնած,
նա երախտագիտութեան խօսքեր յայտնեց ի մասնաւորի Հայաստանի 8-րդ համահայկական խաղերի բիւդջէյի հայթայթման հարցում թափւած ջանքերի, որի շնորհիւ էլ, աւելի մեծաթիւ խմբեր առիթն ունեցան մասնակցելու մրցոյթներին։

Արարատ կազմակերպութիւնը հիմնադրման առաջին օրից իսկ սկսեալ, նպատակադրել է դաստիարակել հայ պատանուն ու երիտասարդին հայկական ջերմ միջավայրում և սպասարկել ու ծառայել համայնքին, այնպէս որ իրապէս Արարատը լինի բոլորի երկրորդ ու սիրելի տունն ու պէտք է շեշտել, որ այդ ուղղութեամբ են աշխատում մեր չորս միութիւններն ու մարմիններն ու նման մի ծանրաբեռնւած օր վկայում է թէ ինչ են անում արարատականներն ու Արարատի կողքին կանգնած ընկերները երբ զբաղւած են աշխատանքներով՝

ամբողջը միատեղ ու միաժամանակ։
2023  թւականի ուրբաթ, դեկտեմբերի 22-ի առաւօտեան մեծ
խանդավառութիւն էր տիրում «Արարատ» մարզաւանի չորս կողմերում։
-  Արւեստից միութեան Մանկապատանեկան երաժշտաթատերական խմբի աշակերտներն ու ծնողները, վարչութեան հրաւէրով ներկայ էին մարզաւանում պարի դահլիճում՝ մասնակցելու ապագայ ծրագրերի իրագործման բացատրական հանդիպմանը, որի աւարտին աշակերտները ստացել են  2023 թւականի աշխատանքներին մասնակցելու առիթով գնահատագրեր։
Կողքում՝ «Շահբազեան» սրահում «Արարատ» պարախմբի աշակերտներն ու ծնողներն եկել էին մասնակցելու ուսուցչական կազմի և ծնողական խորհրդի միջոցով նոր տարւայ առիթով կազմակերպւած  խնջոյքին, որի ընթացքին երեխաները պատրաստել են զարդեր ու իրենց եղեւնին դարձրել տօնածառ և
Նորտարւայ կապակցութեամբ սովորել են ու պարել են յատուկ պար։
Պարախմբի անդամները ևս ստացել են գնահատագրեր և վկայագրեր։
Երաժշտաթատերական խմբի աշակերտները միանալով պարախմբին դիմաւորել են ձմեռ պապին, ստացել են կապոցներ  և անցկացրել ուրախ ժամեր։ Միջոցառմանը ներկայ էին կենտրոնական վարչութեան նախագահն ու Միութեան կապն ու ընկերները։

-  Սկաուտական միութեան անդամները «Վաչիկ Ղարաբէգեան» սրահում իրենց  ծնողների հետ դիմաւորել են ձմեռ պապին։
կազմակերպւել էին զանազան խաղեր, ուրախ ժամանց և  հիւրասիրութիւն։
Անդամները ստացել են  կապոցներ։

-  Մարզական միութեան վարչութեան հրաւէրով նոր ժողովասենեակում տեղի է ունեցել 46-րդ Համադպրոցական խաղերի առիթով  հանդիպում, որին ներկայ էր ԹՀԹ Կրթական խորհրդի նախագահ՝ պրն․Ալֆրէդ Կարապետեանը և բոլոր դպրոցների ծնողական խորհրդների ներկայացուցիչները։
Ժողովի բացումը կատարել է Մարզական միութեան նախագահ՝ ընկեր Արբի Սարգսեանը, նշելով որ 46-րդ Համադրոցական խաղերը նւիրւած է «Արարատ» կազմակերպութեան 80-ամեակին,
և յայտնել է մի շարք բացատրութիւններ։
Այնուհետև խօսքը տրւել է Կրթական խորհրդի նախագահին։
Ներկաները  համեստ ընդունելութեան ընթացքին ունեցել են մտքերի փոխանակում։

-  Երէցների միութեան ամանորի դիմաւորման յանձնախմբի նախապատրաստական աշխատանքները շարունակւում էր։

-  Նախապէս պայմանաւորւածութեամբ Կենտրոնական վարչութեան նախագահ՝ ընկեր Սոֆի Ջաղարբէգեանի հետ նոր տարւայ և հայկական աւանդութիւնների թեմայով ու դրանք միութենական կեանքում իրագործելու կապակցութեամբ հարցազրոյց էր կազմակերպւել RT (Russia today) լրատւական կենտրոնի հետ։

-  Նոյն օրը տեղի է ունեցել Կազմակերպութեան Ֆինասատնտեսական յանձնախմբի հանդիպումը։

-  ՀՄԱԿ-ն թևակոխում է իր հիմնադրման և գործունէութեան 80-րդ տարին։ Ուրբաթ օրը Կազմակերպութեան հիմնադրման  80-ամեակի  յանձնախմբի հրաւէրով հանդիպմանը ներկայ էին ՀՄԱԿ․-ի միութիւնների ու մարմինների նախագահներն,  որտեղ յանձնախմբի փոխ նախագահ՝ ընկեր Լիդա Վարդանեանը մեկնարկել է ժողովը, եղել են մտքերի փոխանակումներ ու առաջադրանքներ։

Հաշւած օրեր են մնացել հրաժեշտ տալու հին տարուն։
Ոչ միայն այս ուրբաթն էր աշխատանքային աշխուժութիւն տիրում այլ տարւայ բոլոր օրերն էլ զանազան ու բազմազան աշխատանքներով են զբաղւում անդամներն, ընկերական ու յիշարժան պահեր անցկացնում միմեանց հետ, սովորում են կեանքի փորձառութիւններ, մարզւում են, արւեստով զբաղւում ու ծառայում անշահախնդիր, միշտ շրջապատւած  ազգային լիցքերով տոգորւած, նւիրեալ ու բարեացակամ բարեկամներով։

20-րդ դարի կէսին պայմանների հրամայականից ելնելով դժւարութիւններն անտեսելով ապրեցին ու արարեցին և մեզ թողեցին թանկագին ժառանգ՝ «Արարատ» Կազմակերպութիւնը։

121 հիմնադիրներ էին, որոնցից է բոլորիս սիրելի և յարգելի ընկեր՝ Յասմիկ Յարութիւնեան Թումանեանը։

Երկուշաբթի, դեկտեմբերի 25-ին, Կենտրոնական վարչութեան նախագահ՝ ընկեր Սոֆի Ջաղարբէգեանը, կազմի ընկերներ Ժանետ Թարվերդեանն ու Անի Խուրշիդեանը և երէց ընկեր Էլպիս Արզումանեանը այցելեցին սիրելի ընկերներ Յասմիկ Յարութիւնեանին և դստերը՝ երկար տարիներ ընկեր ու վարչական՝ Անուշ Թումանեանին, նշելու ընկեր Յասմիկի ծննդեան 100-ամեակն ու միաժամանակ շնորհաւորելու Ամանորն ու սուրբ ծննդեան տօները։
ՀՄԱԿ-ի հիմնադիրներն, օրւայ վարչականներն ու նրանց շարունակողներն օժտւած էին այն տեսլականով, որ համաշխարհային երկրորդ պատերազմից յետոյ անկայուն համայնքի պատանի- երիտասարդներին ի մի բերելով միութեան յարկի տակ՝ աշխարհին յիշեցնեն, որ հայը՝ ապրելու և գոյատևելու կանթեղը կրող ժողովուրդ է։
Այսօր 80-ամեակն թևակոխող Արարատը երբ կը նշի իր Հիմնադրման և գործունէութեան 80-րդ տարին նոյնն է կրկնելու, որ քայլելու և ծառայելու է յանուն ազգի բարօրութեան ու մատաղ սերնդի դաստիարակութեան ճամբին։

Ընկեր Յասմիկը յիշողութեան մի ամբողջ գանձ է, ում հետ խօսելով միայն հիանում ես։
Նա ընդգծեց, որ
- "Արարատում երբէք չենք ընկճւել, բարդութիւններին յաղթահարել և հպարտ մեր հայեացքն առ լուսաւոր ապագան քայլել ենք" ու նոյնն էլ մաղթեց ներկայ ընկերներին։
Ուրախութեամբ նշւեց ընկերոջ 100-ամեակը ապա Կենտրոնական վարչութեան նախագահը, որպէս յիշատակ յանձնեց Արարատ Կազմակերպութեան գերբի տեսքով հրատարակւած ու շրջանակւած նամակադրոշմը։

Ջերմ մթնոլորտում անցաւ հաճելի այցելութիւնը։
Արարատի մեծ ընտանիքը մաղթում է ընկերոջը քաջառողջութիւն և որ միշտ ժպիտն անպակաս լինի դէմքից։

2023 թ․-ի նոյեմբերի 25-ին Կենտրոնական վարչութեան հրաւէրով  ՀՄԱԿ-ի Հանրութեան հետ կապի պատասխանատու ընկեր Անահիտ Աբրահամեանը ներկայ գտնւեց Կենտրոնական վարչութեան ժողովին։

Կենտրոնական վարչութեան նախագահ՝ ընկեր Սոֆի Ջաղարբէգեանը նախ ողջունեց ընկերոջը ապա ընկերը զեկուցեց շրջանի սկզբից մինչ օրս կատարւած աշխատանքները և ապագայի ծրագրերը։

Խօսւեց մի շարք մտահոգութիւնների ու դժւարութիւնների և ապագայի համար առաջարկների շուրջ։

Նշելի է, որ Հանրութեան հետի կապի պատասխանատուն Կենտրոնական վարչութեանը յանձնեց «Լուրեր Արարատից» թիւ 108 տպագրւած 196 էջով գրքոյկը, որը պարունակում է 2021-23 , 45-րդ նստաշրջանի գործունէութիւնը։

Երէկ, սեպտեմբերի 11-ին Կենտրոնական վարչութիւնը հիւրընկալեց Իրանի 54-րդ Համահայկական խաղերին  Սիւնիքի մարզի  Կապան քաղաքից մասնակից մարզիկներին։
Կենտրոնական վարչութեան նախագահ՝ ընկեր Սոֆի Ջաղարբէգեանը նախ ողջունել է սիրելի մարզիկներին իրենց ներկայութեան համար ապա ամփոփ տեղեկութիւններ է փոխանցեկ համայնքի, Արարատ կազմակերպութեան աշխատանքների ու ծրագրերի և Արարատ մարզաւանում տեղի ունեցող միջոցառումների ու առհասարակ անցուդարձի վերաբերեալ։
Նաև  կենտրոնական վարչութիւնը յոյս է յայտնել յառաջիկայ համահայկականին իրենց մեծաթիւ մասնակցութիւնը տեսնելու համար։
Իսկ մարզիկները ևս իրենց հերթին գոհունակութեամբ են անդրադարձել համահայկական խաղերի նախաձեռնութեան և ընթացքի մասին։
Սիւնիքի մարզիկները ուրախութեամբ յայտնեցին՝ սեղանի թենիս խմբային մարզաձևում երրորդ պատւանդանին կանգնելու համար։
Կենտրոնական վարչութեան ընկերները շնորհաւորեցին ձեռք բերւած յաջողութեան համար։

 

2023 թ.-ի յուլիսի 4-ին լրացաւ Հ Մ "Արարատ" Կ-ի հիմնադրման 79-ամեակը։
Այդ առիթով  Կենտրոնական վարչութիւնը կեանքի էր կոչել յանձնախումբ՝ բաղկացած միութիւնների ներկայացուցիչներից։

Միջոցառմանը ներկայ էին արարատականներն  ու իրենց անմիջական հիւրերը Ս Խաչ մատուռի շրջափակում, ուր կահաւորւած էր
տարեդարձին համապատասխան։

Մասնակիցներին տարածքում դիմաւորում էին Կենտրոնական վարչութեան անդամները։

Օրւայ հաղորդավար ընկեր Մեղեդի նազարեանի բացման և ողջոյնի խօսքով մեկնարկեց ծրագիրը, ապա Սկաուտական միութեան դրօշակագարդը ծածանեց Կազմակերպութեան դրօշը միաժամանակ ներկաները ոտնկայս ունկնդրեցին Արւեստից միութեան "Արարատ" երգչախմբի Կազմակերպութեան հիմնը։
Ապա հնչեց "Հոյ Նար"   երգը։

Ամբիոնի մօտ հրաւիրւեց Կենտրոնական վարչութեան նախագահ՝ ընկեր Սոֆի Ջաղարբէգեանը  օրւայ առիթով արտայայտւելու համար։
Նա  բարեմաղթանքներով շնորհաւորեց  79-ամեակը ապա յիշեց անցեալ շրջանում Կազմակերպութեան ընդհանուր աշխատանքների վերաշխուժացման և մասնաւորաբար չորս միութիւնների, մարմինների ու մասնաճիւղերի աշխոյժ գործունէութեան մասին, որը և շարունակւելու է նոյն թափով.
նաև փոխանցեց, որ մօտ օրերին Մարզական, Արւեստից և Սկաուտական միութիւնները մասնակցելու են Հայաստանում տեղի ունենալիք Համահայկական խաղերին և բանակումին և
վերջում յաջողութիւն մաղթեց բոլորին։
Այնուհետև Արւեստից միութեան Մանկապատանեկան Երաժշտաթատերական խումբը ելոյթ ունեցաւ։

"Արարատ" պարախումբը հանդէս եկաւ շրջպարերով, որին միացան ներկաները։

Տեղի ունեցաւ Կարկանդակի հատման արարողութիւնը։
Հատմանը  մասնակցեցին ներկայիս Կենտրոնական վարչութիւնը, միութիւնների նախագահները և անցեալ շրջանների նախագահները։

Արմէն Ասատրեանի միջոցով հնչեց երաժշտութիւններ, որի ներքոյ ներկաներն ուրախ և ընկերական մթնոլորտում
վայելեցին տարեդարձը։

Վերջում հիւրերը մասնակցեցին Երէցների միութեան կողմից և Մարզական ու Սկաուտական միութիւնների օժանդակութեամբ կազմակերպւած հիւրասիրութեանը։

Մինչ ուշ գիշեր հաւաքւած մտերմիկ մթնոլորտում անցաւ երեկոն։

 

 

Կենտրոնական  վարչութեան խօսքը ՀՄԱԿ--ի 79-ամեակի առիթով

 

79-ԱՄԵԱԿԻ ՏԱՐԵԴԱՐՁ


Բարի երեկոյ սիրելի Արարատական ընկերներ, Արարատի բարեկամներ և հիւրեր

Այսօր, մեր սիրելի Կազմակերպութիւնը դառնում է 79 տարեկան: 79 տարիներ առաջ կազմւած փոքրաթիւ միութիւնը, շնորհիւ իր հիմնադիր անդամների ու նրանց յաջորդող սերունդների հեռատեսութեան, գիտակից ու նւիրական աշխատանքի օր է օր զարգացել, բարգավաճել ու դարձել է այսօրւայ հզօր կազմակերպութիւնը, որը ոչ միայն իր անժխտելի դերն ունի իրանահայութեան կեանքում որպէս մեր համայնքի ամենամեծ կազմակերպութիւնը, այլ իր կառոյցով ու հնարաւորութիւններով եւ աշխատանքների ծաւալով ու բազմազանութեամբ հիացմունք է առաջացնում սփիւռքից ու Հայաստանից մեզ այցելող անձանց ու հաստատութիւնների մօտ. և այս բոլորը մեզ համար չափազանց պարտաւորեցնող է, մեզ է վստահւած այս կազմակերպութեան ու գեղեցիկ կառոյցի ոչ միայն պահպանումը, այլ նաև դէպի առաջ ուղղորդելու պարտականութիւնը:
Սիրելիներ, ինչպէս բոլորդ ականատես էք եղել անցեալ մէկ տարւայ ընթացքում կազմակերպութիւնը հետկորոնայական պայմաններում իր աշխատանքային գրեթէ բոլոր բնագաւառներում ապրեց վերաշխուժացման շրջան, իսկ այս տարի ժամանակն է արդիւնքներ քաղել այդ վերաշխուժացումից և նոր քայլեր վերցնել դէպի ապագայ:
Եւ այսպէս, յառաջիկայ երկու ամիսների ընթացքում մեր ամենակարևոր աշխատանքների շարանում’ մեր սկաուտները մասնակցելու են համա-Հ.Մ.Ը.Մ.-ական ընդհանուր բանակումին Հայաստանում, մեր Արւեստից միութեան պարախումբը Հայաստանի Համահայկական Համաշխարհային խաղերի գործադիր կոմիտէի միջոցով հրաւիրւել է ելոյթով ներկայանալու 8-րդ Համահայկական խաղերի բացման արարողութեանը, իսկ մեր մարզիկները մեկնելու են Հայաստան մանակցելու նոյն խաղերի մրցաշարին :
Սիրելիներ մեր Կազմակերպութիւնը ասյօր կանգնած է իր 80 ամեակի շէմին ու մեր բոլորի 1 առ 1-ի ներդրումով ու աջակցմամբ շարունակելու է իր նպատակասլաց երթը, առաւել հասատակամ քայլերով:
Կրկին շնորհավորում ենք բոլորիդ ու ցանկանում նոր վերելքներ մեր սիրելի Կազմակերպութեանը։

2023թ-ի. յունիսի 12-ի երեկոյեան, «Արարատ» մարզաւանի «Սասունցի Դաւիթ» սրահում տեղի ունեցաւ
«Մեծ համերգ» նախաձեռնութեամբ՝
«ԿԱՅՈՒՆ ՀԱՄԱՅՆՔ» նախընտրական շտաբի՝ իր կողքին ունենալով մի շարք հովանաւոր ընկերութիւններ։
Հայաստանից հրաւիրւել էին երգիչ երգչուհիներ, հաղորդավար ու սթէնդ ափ կատակերգու։
Լեցուն սրահը 2 ժամերի ընթացքին մեծ ոգեւորութիւն ապրեց։
Ծրագրի ընթացքին ներկայացւեց շտաբի ամբողջական ցանկը։

2023թ.-ի յունիսի 12-ին, Թեմի առաջնորդ Տ. Սեպուհ արք. Սարգսեանը  Ազգային առաջնորդարանի դահլիճում ընդունեց Հ.Մ."Արարատ" Կազմակերպութեան նորընտիր Կենտրոնական վարչութեանը։
Սրբազան հայրն ողջունեց և օրհնեց կազմին  ստանձնած առաքելութիւնը յաջող  կատարելու գործում։
Կազմի նախագահ՝ ընկեր Սոֆի Ջաղարբէգեանը փոխանցեց իր շնորհակալութիւնները սրբազան հօր հովանաւորութիւնը  ունենալու համար ապա զեկուցեց Կազմակերպութեան յառաջիկայ աշխատանքներից։
Սրբազան հայրը բարձր գնահատեց Արարատ  Կազմակերպութեան  առաքելութիւնն ի մասնաւորի սերնդի հայեցի դաստիարակութեան հարցում և Կազմակերպութեան  դերը իրանահայութեան կեանքում։
Սրբազան հայրը վերելքներ և յաջողութիւններ  մաղթեց կազմին յառաջիկայ շրջանում։