Փետրւարի 8-ին Հ.Մ. «Արարատ» Կ.-ի Կենտրոնական վարչութիւնն իր հերթական նիստի ընթացքում հիւրընկալեց 45-րդ համադպրոցական խաղերի պատասխանատու ընկ. Անահիտ Նազարեան, մարզաձեւերի պատասխանատու ընկ. Արթին Մինասեան եւ բացման հանդիսութեան պատասխանատու ընկ. Արմոնդ Միրզախանեանին:

Նիստի մեկնարկին ընկերները զեկոյց ներկայացրեցին խաղերի անցկացման, մասնակիցների թւի, մարզաձեւերի եւ բացման արարողութեան կարգի վերաբերեալ:

Կենտրոնական վարչութեան անդամները բարձր գնահատեցին իրականացրած աշխատանքներն, այնուհետեւ որոշ դիտարկումներ եւ նկատառումներ կատարեցին խաղերի պատաշաճ իրականացման վերաբերեալ:

Փետրւարի 1-ին Թեհրան են ժամանել Հայաստանի ձմեռային Պառամարզաձեւերի ֆեդերացիայի դահուկորդները, որոնք կը մասնակցեն Իրանում կայանալիք պառալեռնադահուկային սպորտի մրցաշարին, մինչեւ մրցաշարի մեկնելը դահուկորդներն, այդ թւում՝ արցախեան 44-օրեայ պատերազմի մասնակից տղաները հիւրընկալւել են Հ.Մ. «Արարատ» մարզաւանում:

Առաջին օրն «Արարատ» մարզաւանում մարզիկներին դիմաւորել են Կազմակերպութեան Կենտրոնական վարչութեան եւ Մարզական միութեան վարչութեան ընկերները:

Փետրւարի 2-ին, Մարզական միութեան ներկայացուցիչների ուղեկցութեամբ այցելել են Թեհրանի հայոց Թեմի ազգային առաջնորդարան եւ հանդիպել են Թեհրանի Հայոց թեմի առաջնորդ Գերշ. Տէր Սեպուհ արք. Սարգսեանին՝ ստանալով սրբազան հօր հայրական աղօթքը:

Մարզիկներն առաջնորդարան կատարած այցի ընթացքում հանդիպում են ունեցել նաեւ Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի հետ:

Այնուհետեւ, այցելել են «Ալիք» օրաթերթի խմբագրութիւն եւ ծանօթացել են օրաթերթի պատմութեանն ու աշխատանքներին:

Հայաստանի ձմեռային Պառամարզաձեւերի ֆեդերացիայի դահուկորդները փետրւարի 2-ի գիշերը Կենտրոնական վարչութեան ներկայացուցիչների մասնակցութեամբ, հիւրընկալւել են «Տնակ» ռեստորանում:

Նրանք այսօր՝ փետրւարի 3-ի առաւօտեան մասնակցել են Կազմակերպութեան երէցների միութեան կազմակերպած ամսական ընդհանուր հանդիպմանն, որի դասախօսն է եղել վաստակաւոր ընկ. Վարուժան Առաքելեանը:

Նշենք, որ Իրանում կայանալիք պառալեռնադահուկային սպորտի մրցաշարը կանցկացւի Իրանի «Թոչալ» միջազգային դահուկային կորտում:

Դահուկային սպորտի միջազգային ֆեդերացիայի կազմում ընդգրկւած են դահուկորդներ Հայկ Աբգարեանը, Ստասիկ Նազարեանը, Տիգրան Գրիգորեանը եւ Էրիկ Գրիգորեանը:

Ֆեդերացիայի գլխաւոր նպատակն է Հայաստանում հաշմանդամային սպորտի զարգացումը: Ֆիզիկական եւ հոգեբանական շատ դժւարութիւններ յաղթահարած պառալիմպիկ մարզիկները ունեն առաքելութիւն՝ ճանապարհ հարթել հաշմանդամութիւն ունեցող նոր սերնդի, մասնաւորապէս՝ արցախեան պատերազմի հետեւանքով հաշմանդամութիւն ձեռքբերած տղաների համար՝ պասիւ կեանքից վերադարձնելու աւելի ակտիւ սպորտային կեանք:

Յունւարի 28-ին տեղի ունեցաւ «Նոր միտք» նախագծի դիսկուրս-քննարկումը՝ ի՞նչ է բորսան եւ ինչպէս ծաւալել բորսային գործունէութիւն թեմայով, որի բանախօսներն էին ոլորտի երիտասարդ մասնագէտներ Ադենա Թորոսեանը եւ Ժորէս Արզումանեանը:

Հանդիպման սկզբին «Նոր միտք» նախագծի անունից դասախօսներին ներկայացրեց ընկ. Արա Ջահանեանն, այնուհետեւ անդրադարձաւ նախագծի առաքելութեանը եւ նպատակներին՝ նշելով, որ փորձ է կատարւում անդրադառնալ ամենատարբեր թեմաներին եւ ապահովել հասարակութեան իրազեկւածութիւնը՝ ներգրաււելով հասարակական տարբեր շերտերի ներկայացուցիչների:

Այնուհետեւ, օրւայ բանախօսները լսարանին լայնածաւալ եւ համապարփակ տեղեկութիւն փոխանցեցին թեմայի առնչութեամբ, անդրադարձան տնտեսական ուղղւածութիւն ունեցող բորսայի շուկային՝ նշելով, որ այն միջնորդ օղակ է, որն ապահովում է տարբեր ապրանքների ու ծառայութիւնների՝ ըստ պահանջարկի իրացումը։

Անդրադարձան տարբեր տեսակի արժեթղթերի ռիսկայինութեանը, ապրանքի գնորդի եւ վաճառողի միջեւ յարաբերութիւններին, ապրանքային, ֆոնդային, արժութային եւ այլ բորսային տեսակներին:

Հանդիպման աւարտին ներկաները բարձրաձայնեցին ոլորտի վերաբերեալ իրենց յուզող հարցերն ու խնդիրները:

Բանախօսները պատրաստակամութիւն յայտնեցին՝ օժանդակել բորսայի նորամուրներին, ինչպէս նաեւ խորհրդատւութիւն փոխանցել անհրաժեշտութեան դէպքում, եւ յաւելեալ դասընթացներ անցկացնել ցանկացողների համար:

Յունւարի 28-ին Կենտրոնական վարչութիւնն իր հերթական նիստի ընթացքում հիւրընկալեց Արցախի Հանրապետութեան մարդու իրաւունքների պաշտպան Գեղամ Ստեփանեանին եւ ՀՀ Ազգային ժողովի «Հայաստան» խմբակցութեան պատգամաւոր Ասպրամ Կրպէեանին, որոնք այսօրերին հիւրաբար գտնւում են Թեհրանում մասնակցելու նախօրէին տեղի ունեցած համահաւաքին եւ այսօր՝ յունւարի 29-ին նախատեսւած դասախօսական միջոցառմանը:

Հանդիպման սկզբին Կենտրոնական վարչութեան փոխնախագահ ընկ. Արա Գալստեանը ողջունեց հիւրերի ներկայութիւնը եւ ուրախութիւն յայտնեց Թեհրանում նրանց հիւրընկալելու համար: Այնուհետեւ, անդրադարձաւ Հ.Մ. «Արարատ» Կ.-ի ծրագրերին, աշխատանքներին եւ 78-ամեայ կազմակերպութեան գործունէութեանը:

Հանդիպման ընթացքում ԱՀ ՄԻՊ Գեղամ Ստեփանեանը ներկայացրեց Արցախի Հանրապետութեան 47-օրեայ շրջափակման հետեւանքները եւ Ադրբեջանի կողմից Արցախի նկատմամբ իրականացւող մարդու իրաւունքների խախտումները, շրջափակման հետեւանքով առաջացած հումանիտար ճգնաժամը եւ դրանց հետեւանքով այլ հիմնարար իրաւունքների խախտման հարցերը:

Գեղամ Ստեփանեանը շեշտեց, որ կարեւոր դերակատարութիւն ունի սփիւռքը Արցախի շրջափակման հարցը աշխարհի տարբեր երկրներին ներկայացնելու ուղղութեամբ:

Նա նշեց, որ նամակներ է ուղարկել ԵԽ մարդու իրաւունքների յանձնակատարին, ԻՒՆԻՍԵՖ-ի գլխաւոր տնօրէնին եւ մարդու իրաւունքների պաշտպանութեամբ զբաղւող այլ միջազգային կազմակերպութիւններին ու դերակատարներին:

ՀՀ ԱԺ պատգամաւոր Ասպրամ Կրպէեանն եւս անդրադարձաւ Հայաստանի ներքաղաքական եւ հասարակական տրամադրութեանը, անտարբերութեան խնդրի յաղթահարման կարեւորութեանը եւ Արցախի ժողովրդի ինքնորոշման իրաւունքի իրացման անհրաժեշտութեանն, ինչպէս նաեւ՝ անջատում յանուն փրկութեան միջազգային իրաւունքի իրացման պայմանների ապահովման ջանքերին:

Ուրբաթ՝ յունւարի 20-ին Հ.Մ. «Արարատ» Կ.-ի Կենտրոնական վարչութեան հրաւէրով տեղի ունեցաւ խորհրդակցական հանդիպում՝ «80-ամեակին ընդառաջ» խորագրով:

Հանդիպմանը հրաւիրւած էին Կազմակերպութեան նախկին նախագահներ եւ փոխնախագահներ, միութիւնների, մարմինների ներկայացուցիչներ, ինչպէս նաեւ մեդիա ոլորտի մասնագէտներ:

Նիստի մեկնարկին կենտրոնական վարչութեան նախագահ ընկ. Հենրիկ Խալոյեանն ողջունեց ընկերների ներկայութիւնն, այնուհետեւ, անդրադարձաւ հանդիպման անցկացման նպատակներին:

Ընդգծելով, որ մինչեւ Հ.Մ.Ա.Կ.-ի հիմնադրման եւ գործունէութեան 80-ամեակի ծրագրերի պաշտօնական մեկնարկը, մի շարք աշխատանքներ անհրաժեշտ են օր առաջ կազմակերպել եւ գործադրել, որոնք մեծամասնաբար, ըստ Հենրիկ Խալոյեանի կապւած են՝ մեդիա եւ արխիւային ոլորտներին:

Կազմակերպութեան նախագահը մասնաւորապէս, 12 կէտերով թւարկեց այն օրակարգային կարեւոր աշխատանքներն, որոնք ըստ նրա օր առաջ հարկաւոր են մեկնարկել եւ ամբողջացնել, այդ թւում՝ Կազմակերպութեան մասին պատմող պարսկերէն լեզւով գրքի հրատարակութիւնը, քարոզչական աշխատանքերի ուղղութեամբ՝ մեդիա ոլորտում ակտիւութիւն ապահովող նոր ծրագերի իրացկանացում՝ Wikipedia, Youtube եւ այլ հարթակներ, ինչպէս նաեւ՝ Կազմակերպութեան լուսանկարների շտեմարանի ձեւաւորում:

«Մեր հարուստ արխիւը հնարաւորութիւն է ընդձեռնում ունենալ «Արարատ»-ի թանգարան, որի գծագիրն արդէն իսկ պատրաստ է, նաեւ Արխիւային յանձնախումբն առաջարկել է «Արարատ»-ի եւ Թեհրանա-հայութեան թատերական պատմութեան մասին գրքի հրատարակութիւն կազմակերպել»,- նշեց ընկ. Խալոյեանը յաւելելով, որ Կազմակերպութեան 60-ամեակի գրքի համալրման աշխատանքները եւս օրակարգում են, ինչպէս նաեւ 80-ամեակի գրքի թւայնացումը կամ տպագիր հրատարակութեան ծրագրերը:

Նիստի ընթացքում տեղի ունեցաւ քննարկում, ներկաները պատրաստակամութիւն յայտնեցին աջակցել Կենտրոնական վարչութեան ներկայացրած ծրագրերի իրականացման ուղղութեամբ, մասնաւորապէս մտահոգութիւն յայտնեցին այնպիսի հարցերի վերաբերեալ ինչպէս են՝ մարդուժ, ֆինանսական աղբիւրներ եւ այլն, նաեւ առաջարկներ հնչեցին կազմակերպութեան 80-ամեակի տօնակատարութեան նպատակով տարբեր նախաձեռնութիւնների իրականացման վերաբերեալ:

յունւարի 21-ին, Հ.Մ. «Արարատ» Կ.-ի Կենտրոնական վարչութիւնն իր հերթական նիստի ընթացքում հիւրընկալեց Կազմակերպութեան հանրութեան հետ կապերի պատասխանատու ընկ. Անահիտ Աբրահամեանին:

Նիստի մեկնարկին Կենտրոնական վարչութեան նախագահ ընկ. Հենրիկ Խալոյեանն ողջունեց ընկերոջ ներկայութիւնը եւ բարձր գնահատեց կազմակերպութեան աշխատանքների լուսաբանման ուղղութեամբ հանրութեան հետ կապերի աշխատանքը:

Այնուհետեւ, անդրադարձաւ ժողովրդի հետ սահուն կապերի ապահովման կարեւորութեանը, մասնաւորապէս՝ հաղորդակցութեան սահունացման, նոր միջոցների կիրառման անհրաժեշտութեան, տեղեկագրերի, գրքերի եւ այլ տեխնոլոգիաներով միութենականների եւ ժողովրդի հետ կապերի ամրապնդման անհրաժեշտութեանը:

Նիստի ընթացքին մտքերի փոխանակում կատարւեց տարբեր տպագրական աշխատանքների կատարման վերաբերեալ:

Նիստի ընթացքում կենտրոնական վարչութեան եւ Հանրութեան հետ կապերի պատասխանատուի միջեւ կատարւեց բովանդակային քննարկում:

Յունւարի 17-ին, Հ.Մ. «Արարատ» Կազմակերպութեան կենտրոնական վարչութիւնն իր հերթական նիստը գումարեց «Արարատ» Կենտրոնատեղիում: Նիստի օրակարգի առաջին կէտն էր՝ «Արարատ» Կենտրոնատեղիի վարիչ մարմնի անդամների հետ հանդիպում:

Հանդիպմանը ներկայ էին Կենտրոնական վարչութեան բոլոր անդամները, Կենտրոնատեղիի վարիչ մարմնի ընկերներ Լուդւիկ Նազարեանը եւ Արմէն Զարգարեանը, ինչպէս նաեւ վարիչ Էդւին Յարութիւնեանը:

Նիստի մեկնարկին կազմակերպութեան կենտրոնական վարչութեան նախագահ ընկ. Հենրիկ Խալոյեանն ողջունեց վարիչ մարմնի ներկայութիւնը եւ բարձր գնահատեց բարեկարգման նպատակով իրականացրած վերջին շրջանի աշխատանքները:

Մասնաւորապէս, մտքերի փոխանակում կատարւեց կենտրոնատեղիի զարգացման ծրագրերի վերաբերեալ, այդ թւում՝ Կազմակերպութեան պատմութիւնը ներկայացնելու եւ վայրի կարեւորութիւնը վեր հանելու նոր հնարաւորութիւնների առնչութեամբ:

Կենտրոնական վարչութեան ընկերները նախքան նիստի մեկնարկը տեղում հետեւեցին ուրբաթ՝ յունւարի 20-ին, Հ.Մ. «Արարատ» Կ.-ի Արւեստից միութեան կազմակերպած Ս. Ծննդեան երգերի բացատրական համերգի նախապատրաստական փորձերին:

Այնուհետեւ, շրջայց կատարեցին «Արարատ» նոբահարի տարբեր բաժիններ, այդ թւում՝ «Կոմիտաս» սրահ, բեմի ընդերք, կուլիսներ, սրահներ՝ ծանօթանալով խնդիրներին եւ հարցերին:

յունւարի 12-ին Հ.Մ. «Արարատ» մարզաւան այցելեցին Չեմպիոնական մարզաձեւերի հովանաւորութեան հիմնադրամի պատասխանատուները:

Ս. Ծննդեան եւ Ամանորի տօների առթիւ կատարւած այցելութեանը հիմնադրամի պատասխանատուներին ընդունեցին Կենտրոնական վարչութեան նախագահ ընկ. Հենրիկ Խալոյեանը եւ փոխնախագահ ընկ. Արա Գալստեանը:

Հանդիպման ժամանակ հիմնադրամի անդամները շրջայց կատարեցին մարզաւանում եւ ծանօթացան իրականացւող աշխատանքներին:

Այնուհետեւ, մտերմիկ զրոյց ունեցան կազմակերպութեան ղեկավարութեան հետ, որի ընթացքում քննարկւեց կազմակերպութեան զարգացման, մասնաւորապէս՝ չեմպիոնական եւ օլիմպիական մարզաձեւերի զարգացման ծրագրերը:

Այնուհետեւ, Կազմակերպութեան նախագահ ընկ. Հենրիկ Խալոյեանը հիմնադրամի պատասխանատուներին նւիրեց յուշանւէր:

Հանդիպմանը ներկայ էին նաեւ մարզաւանի վարիչ ընկ. Արա Անտոնեանը, մարզական միութեան վետերան ընկեր Մայիս Մինասեանը, ինչպէս նաեւ Լեգենդար ծանրամարտիկ, օլիմպիական մեդալակիր Մոհամմադ Նասիրին:

Դեկտեմբերի 16-ին Հայ Յեղափոխական Դաշնակցութեան 132-ամեակի միջոցառմանը մասնակցելու նպատակով ՀՅԴ Բիւրոյի ներկայացուցիչ Յակոբ Տէր Խաչատուրեանն այցելել է Հ.Մ. «Արարատ» Կ.-ի Կոմիտաս սրահ:
Նախքան ծրագրի մեկնարկը Յակոբ Տէր Խաչատուրեանը հանդիպել է պաշտօնական հիւրերի հետ եւ գրառում է կատարել Կազմակերպութեան յուշամատեանում:

Դեկտեմբերի 17-ին տեղի ունեցաւ «Նոր միտք» նախագծի խօսոյթ-քննարկումն, որի բանախօսներն էին «Սիփանի թատրոնի տան» կազմը:

Հանդիպման սկզբին «Նոր Միտք» նախագծի անդամ ընկ. Արա Ջահանեանը բարիգալստեան խօսքեր յայտնեց հիւրերին, ապա անդրադարձաւ նախագծի նպատակներին, նշելով, որ Նոր միտք խումբը նպատակ ունի խօսոյթ-քննարկման մթնոլորտ ստեղծել սոցիալական տարբեր շերտերի միջեւ, այնուհետեւ ներկայացրեց օրւայ բանախօսներին:

Արա Ջահանեանը, մասնաւորապէս իր խօսքերի ընթացքին բարձր գնահատեց «Սիփանի թատրոնի տան» վերջին՝ «Ապակէ գազանանոց» ներկայացման բեմականացման գաղափարը, որն ամերիկացի դրամատուրգ Թենեսի Վիլիամզի ստեղծագործութիւնն է, մասնաւորապէս՝ ռեժիսոր Բիայնա Մահմուդիի միջոցով այն իւրովի մատուցումը եւ դերակատարների դրսեւորած բարձր հմտութիւնը:

Հանդիպման ընթացքին թատրոնի ռեժիսոր Բիայնա Մահմուդին, դերասաններ Էրւին Գալստեան, Անի Զաքարեան, Սարբէ Օհանեան, պարուսոյց Մելան Սեֆեանը, ինչպէս նաեւ տեքստերի հեղինակ Շարիս Մելքոմ Աբգարը անդրադարձան պիեսի բեմականացման գործընթացին, կարեւորեցին խմբային աշխատանքը, կազմի անդամների միջեւ համագործակցային մթնոլորտը, բարձրորակ արւեստի ապահովման ուղղութեամբ բազմակողմանի ջանքերն ու այլ թեմաների:

Հանդիպմանը ներկայ էին նաեւ Հ.Մ. «Սիփան» միութեան Արւեստից բաժանմունքի անդամներն, որոնք եւս անդրադարձան ներկայացմանը եւ որակեալ թատրոն ունկնդրելու մշակոյթի տարածման քայլերին: