Հրատարակութիւն

PDF

Կենտրոնական Վարչութիւն

յունւարի 21-ին, Հ.Մ. «Արարատ» Կ.-ի Կենտրոնական վարչութիւնն իր հերթական նիստի ընթացքում հիւրընկալեց Կազմակերպութեան հանրութեան հետ կապերի պատասխանատու ընկ. Անահիտ Աբրահամեանին:

Նիստի մեկնարկին Կենտրոնական վարչութեան նախագահ ընկ. Հենրիկ Խալոյեանն ողջունեց ընկերոջ ներկայութիւնը եւ բարձր գնահատեց կազմակերպութեան աշխատանքների լուսաբանման ուղղութեամբ հանրութեան հետ կապերի աշխատանքը:

Այնուհետեւ, անդրադարձաւ ժողովրդի հետ սահուն կապերի ապահովման կարեւորութեանը, մասնաւորապէս՝ հաղորդակցութեան սահունացման, նոր միջոցների կիրառման անհրաժեշտութեան, տեղեկագրերի, գրքերի եւ այլ տեխնոլոգիաներով միութենականների եւ ժողովրդի հետ կապերի ամրապնդման անհրաժեշտութեանը:

Նիստի ընթացքին մտքերի փոխանակում կատարւեց տարբեր տպագրական աշխատանքների կատարման վերաբերեալ:

Նիստի ընթացքում կենտրոնական վարչութեան եւ Հանրութեան հետ կապերի պատասխանատուի միջեւ կատարւեց բովանդակային քննարկում:

Յունւարի 17-ին, Հ.Մ. «Արարատ» Կազմակերպութեան կենտրոնական վարչութիւնն իր հերթական նիստը գումարեց «Արարատ» Կենտրոնատեղիում: Նիստի օրակարգի առաջին կէտն էր՝ «Արարատ» Կենտրոնատեղիի վարիչ մարմնի անդամների հետ հանդիպում:

Հանդիպմանը ներկայ էին Կենտրոնական վարչութեան բոլոր անդամները, Կենտրոնատեղիի վարիչ մարմնի ընկերներ Լուդւիկ Նազարեանը եւ Արմէն Զարգարեանը, ինչպէս նաեւ վարիչ Էդւին Յարութիւնեանը:

Նիստի մեկնարկին կազմակերպութեան կենտրոնական վարչութեան նախագահ ընկ. Հենրիկ Խալոյեանն ողջունեց վարիչ մարմնի ներկայութիւնը եւ բարձր գնահատեց բարեկարգման նպատակով իրականացրած վերջին շրջանի աշխատանքները:

Մասնաւորապէս, մտքերի փոխանակում կատարւեց կենտրոնատեղիի զարգացման ծրագրերի վերաբերեալ, այդ թւում՝ Կազմակերպութեան պատմութիւնը ներկայացնելու եւ վայրի կարեւորութիւնը վեր հանելու նոր հնարաւորութիւնների առնչութեամբ:

Կենտրոնական վարչութեան ընկերները նախքան նիստի մեկնարկը տեղում հետեւեցին ուրբաթ՝ յունւարի 20-ին, Հ.Մ. «Արարատ» Կ.-ի Արւեստից միութեան կազմակերպած Ս. Ծննդեան երգերի բացատրական համերգի նախապատրաստական փորձերին:

Այնուհետեւ, շրջայց կատարեցին «Արարատ» նոբահարի տարբեր բաժիններ, այդ թւում՝ «Կոմիտաս» սրահ, բեմի ընդերք, կուլիսներ, սրահներ՝ ծանօթանալով խնդիրներին եւ հարցերին:

յունւարի 12-ին Հ.Մ. «Արարատ» մարզաւան այցելեցին Չեմպիոնական մարզաձեւերի հովանաւորութեան հիմնադրամի պատասխանատուները:

Ս. Ծննդեան եւ Ամանորի տօների առթիւ կատարւած այցելութեանը հիմնադրամի պատասխանատուներին ընդունեցին Կենտրոնական վարչութեան նախագահ ընկ. Հենրիկ Խալոյեանը եւ փոխնախագահ ընկ. Արա Գալստեանը:

Հանդիպման ժամանակ հիմնադրամի անդամները շրջայց կատարեցին մարզաւանում եւ ծանօթացան իրականացւող աշխատանքներին:

Այնուհետեւ, մտերմիկ զրոյց ունեցան կազմակերպութեան ղեկավարութեան հետ, որի ընթացքում քննարկւեց կազմակերպութեան զարգացման, մասնաւորապէս՝ չեմպիոնական եւ օլիմպիական մարզաձեւերի զարգացման ծրագրերը:

Այնուհետեւ, Կազմակերպութեան նախագահ ընկ. Հենրիկ Խալոյեանը հիմնադրամի պատասխանատուներին նւիրեց յուշանւէր:

Հանդիպմանը ներկայ էին նաեւ մարզաւանի վարիչ ընկ. Արա Անտոնեանը, մարզական միութեան վետերան ընկեր Մայիս Մինասեանը, ինչպէս նաեւ Լեգենդար ծանրամարտիկ, օլիմպիական մեդալակիր Մոհամմադ Նասիրին:

Դեկտեմբերի 16-ին Հայ Յեղափոխական Դաշնակցութեան 132-ամեակի միջոցառմանը մասնակցելու նպատակով ՀՅԴ Բիւրոյի ներկայացուցիչ Յակոբ Տէր Խաչատուրեանն այցելել է Հ.Մ. «Արարատ» Կ.-ի Կոմիտաս սրահ:
Նախքան ծրագրի մեկնարկը Յակոբ Տէր Խաչատուրեանը հանդիպել է պաշտօնական հիւրերի հետ եւ գրառում է կատարել Կազմակերպութեան յուշամատեանում:

Դեկտեմբերի 17-ին տեղի ունեցաւ «Նոր միտք» նախագծի խօսոյթ-քննարկումն, որի բանախօսներն էին «Սիփանի թատրոնի տան» կազմը:

Հանդիպման սկզբին «Նոր Միտք» նախագծի անդամ ընկ. Արա Ջահանեանը բարիգալստեան խօսքեր յայտնեց հիւրերին, ապա անդրադարձաւ նախագծի նպատակներին, նշելով, որ Նոր միտք խումբը նպատակ ունի խօսոյթ-քննարկման մթնոլորտ ստեղծել սոցիալական տարբեր շերտերի միջեւ, այնուհետեւ ներկայացրեց օրւայ բանախօսներին:

Արա Ջահանեանը, մասնաւորապէս իր խօսքերի ընթացքին բարձր գնահատեց «Սիփանի թատրոնի տան» վերջին՝ «Ապակէ գազանանոց» ներկայացման բեմականացման գաղափարը, որն ամերիկացի դրամատուրգ Թենեսի Վիլիամզի ստեղծագործութիւնն է, մասնաւորապէս՝ ռեժիսոր Բիայնա Մահմուդիի միջոցով այն իւրովի մատուցումը եւ դերակատարների դրսեւորած բարձր հմտութիւնը:

Հանդիպման ընթացքին թատրոնի ռեժիսոր Բիայնա Մահմուդին, դերասաններ Էրւին Գալստեան, Անի Զաքարեան, Սարբէ Օհանեան, պարուսոյց Մելան Սեֆեանը, ինչպէս նաեւ տեքստերի հեղինակ Շարիս Մելքոմ Աբգարը անդրադարձան պիեսի բեմականացման գործընթացին, կարեւորեցին խմբային աշխատանքը, կազմի անդամների միջեւ համագործակցային մթնոլորտը, բարձրորակ արւեստի ապահովման ուղղութեամբ բազմակողմանի ջանքերն ու այլ թեմաների:

Հանդիպմանը ներկայ էին նաեւ Հ.Մ. «Սիփան» միութեան Արւեստից բաժանմունքի անդամներն, որոնք եւս անդրադարձան ներկայացմանը եւ որակեալ թատրոն ունկնդրելու մշակոյթի տարածման քայլերին:

Դեկտեմբերի 12-ին Հ. Մ. «Արարատ» Կ.-ի Կենտրոնական վարչութիւնը հիւրընկալեց ՀՅԴ Բիւրոյի ներկայացուցիչ Յակոբ Տէր-Խաչատուրեանին, որին ուղեկցում էր «Ալիք» հաստատութեան ներկայացուցիչ Սեւան Դանիէլեանը:

Հանդիպման սկզբին Կենտրոնական վարչութիւնը Յակոբ Տէր Խաչատուրեանին է ներկայացրել կազմակերպութեան հնարաւորութիւնները եւ աշխատանքները, այնուհետեւ համատեղ հանդիպում են ունեցել:

Հ.Մ.Ա.Կ.-ի նախագահ Հենրիկ Խալոյեանը մարզաւանի տարբեր բաժիններ շրջայցին համապարփակ զեկոյց է ներկայացրել կազմակերպութեան պատմութեան եւ գործունէութեան վերաբերեալ: Ընկ. Հենրիկ Խալոյեանն անդրադարձել է կազմակերպութեան 4 մասնաճիւղերի աշխատանքներին, այդ թւում՝ Շիրազի, Ուրմիայի, Գեարդաբադի եւ Թաւրիզի մասնաճիւղերի ընկերների գործունէութեանը, արտաքին յարաբերութիւնների օրակարգին առնչւող թեմաներին, ՀՄԸՄ-ի, ՀԱՍԿ-ի եւ համազգայինի հետ կապերի խորացման ծրագրերին, եւ համահայկական նշանակութիւն ունեցող յարաբերութիւնների ընդլայնման փորձերին:

Տէր-Խաչատուրեանն իր խօսքերում նշել է, որ կարեւորում է ՀՅԴ-ի աշխատանքներն եւ նախաձեռնութիւններին ՀՄԱԿ-ի մասնակցութիւնը, մասնաւորապէս՝ համաՀՄԸՄ-ական եւ համազգայինական աշխատանքներին: Շեշտելով, որ ՀՅԴ ուղեկից կազմակերպութիւններին խրախուսում է կապեր ունենալ ՀՕՄ-ի հետ, եւ, որպէսզի մեր Իրանի համայնքն իրեն առանձնացած չզգայ համահայկական մեր ընտանիքներին մաս կազմելու առումով:

Նա իր խօսքերի մէկ այլ հատւածում կարեւորել է կամաւորական աշխատանքների անհրաժեշտութիւնը եւ կամաւորականութեան մշակոյթը տարածելու հարկադրանքը եւ պատրաստակամութիւն յայտնել նպաստել «Արարատ»-ի զարգացմանն եւ գործակցութիւնների խորացմանը:

Ընկ. Խալոյեանն իր հերթին շնորհակալութիւն է յայտնել ՀՅԴ Բիւրոյի ներկայացուցչի այցի վերաբերալ, նշելով, որ անշուշտ առկայ է համագործակցութեան մեծ ներուժ, այդ թւում՝ իրանահայութեան խնդիրների լուծման, զարգացման, վերափոխման, երիտասարդութեան ներգրաււածութեան ապահովման օրակարգերի առնչութեամբ:

Նիստին Հ.Մ.Ա.Կ.-ի նախագահը եւ ՀՅԴ Բիւրոյի ներկայացուցիչը մտքեր են փոխանակել արտագաղթի եւ հոսքերի հնարաւոր աճի եւ հետեւանքների առնչութեամբ:

Հանդիպման աւարտին Կազմակերպութեան Կենտրոնական վարչութեան անունից Յակոբ Տէր-Խաչատուրեանին են նւիրել Հ.Մ.Ա.Կ.-ի 60-ամեակի գիրքը:

Դեկտեմբերի 5-ին Հ.Մ. «Արարատ» Կազմակերպութիւն է այցելել Թեհրանի քաղաքապետարանի 3-րդ շրջանի 1-ին մասի նորանշանակ քաղաքապետ ճրտգ. Մէհդի Մոսայեբիի գլխաւորած պատւիրակութիւնը:

Քաղաքապետին ընդունել են Հ.Մ. «Արարատ» Կ.-ի Կենտրոնական վարչութեան նախագահ՝ ընկ. Հենրիկ Խալոյեանը, փոխնախագահ՝ Արա Գալստեանը, Կենտրոնական վարչութեան անդամ՝ ընկ. Արմանդ Դրորրը և
Մարզաւանի վարիչ մարմնի ընկերները։
Հանդիպմանը ներկայ է եղել նաեւ Թեհրանի քաղխորհուրդներին աջակցող մարմնի իրանահայ անդամներից՝ Արէն Պօղոսեանը:

Հանդիպման ընթացքում ներկաները շրջել են Հ.Մ. «Արարատ» մարզաւանի տարածքում, քաղաքապետին ներկայացւել է վերանորոգման անհրաժեշտութեան վայրերը:
Հ.Մ. «Արարատ» Կազմակերպութեան նախագահը ողջունելով հիւրերին, կարեւորել է այն աշխատանքները, որոնք կատարում են քաղաքապետարանի կողմից: Ընկ. Հենրիկ Խալոյեանը ընդգծել է, որ Հ.Մ. «Արարատ» Կ.-ը մեծապէս կարեւորում է յարաբերութիւնների խորացումը քաղաքապետարանի հետ, մասնաւորապէս, շեշտելով Կազմակերպութեան եւ քաղաքապետարանի միջեւ համագործակցութիւնների ծաւալման անհրաժեշտութիւնը՝ Մարզաւանի պահպանման, վերանորոգման, հնարաւորութիւնների ընդլայնման եւ ինժիներական աշխատանքների կատարման ուղղութեամբ:
Ճրտգ. Մոսայեբին շնորհակալութիւն յայտնելով, ընդունելութեան համար նշել է, որ կարեւորում է քաղաքապետարանին յարակից միջավայրերի պահպանումը, այդ թւում՝ Հ.Մ. «Արարատ» Կազմակերպութեան եւ պատրաստակամութիւն է յայտնել նպաստելու մարզաւանի հնարաւորութիւնների զարգացմանն ու ընդլայնմանը: